Charter Document - 02220618

Nous Katherine de Jonvile dame d'Andelot façons savoir à touz que nous pour nous et pour noz hoirs havons baillié delivré et outroié baillons delivrons et outroions à très haut baron et poissant nostre chier et bien amey seignour mons Hugue de Chalon signour d'Allay pour luy et pour ses hoirs et ces qui cause auront de luy tout le droit action raison reclamacion signorie et chalonge que nous havons havoir poons et devons pour raison de douaille à Cusel es appartenances appendises et en toute la chestellenie de Cusel et autre part en quelque leu que ce soit et coment que on le puisse appeler soit en fié rierefiez demeneures et en toutes autres rentes et choses quex qu'elles soient et coment que l'on puisse appeler pour doux cenz livrées de terre à tornois que lidiz sires d'Allay nous a bailliés et delivrez assis et assigney à nostre vie tant soulement sus les choses cy après devisées c'est à savoir sus la maison fort de Regne les molins le pontenaige la messerie le peaige les tailles la justice et signorie des homes de Regne et de La Chapelle la taille justice et signorie de sept maignies d'omes que lidiz Hugues a à By huit septures de prey assises ou terretoires de Regne les censes et l'avenerie de Regne un bichet de froment de rente à Regne ses bois de Regne les servises des pescheours de Regne et la pescherie en la reviere de Louhe Et ces choses dessusdites nous a baillié lidiz Hugues à nostre vie tant soulement pour les dites doux cenz livrées de terre à tornois Et est à savoir que lidiz Hugues a retenu à luy ses vignes de Regne l'achat des vins ansi con acostumé l'avoit de prendre à temps de vendenges l'eschoite de la chestellanie de Regne entierement la mainmorte en toute la chestellenie de Regne et à By assiment et que il puisse faire peschier en la reviere de Louhe toutes foiz que luy plera les loux des vendues et de touz autres contraict fait à Regne en la chestellenie et à By auximent la justice et signorie en toutes les choses retenues à luy et retenuz encor à luy cenz soudées de terre sus le pontenaige la messerie et le peaige que il a donez à mons Hugue de Chaiz son chapellain Encor est à savoir que toutes les choses que lidiz Hugues nous a bailliez et delivrey pour lesdites doux cenz livrées de terre sunt doivent estre et demorer dou fiez doudit Hugue et que lidiz Hugues cil qui cause auront de luy et ses genz poent doivent aler et passer par Regne à armes et recepter par temps de guerre et de paix toutes foiz que adit Hugue à ses hoirs et à ses genz plaira Et toutes foiz que lidiz Hugues sui hoirs et ses comandement nous bailleront et delivreront mil livres de bons petiz tornois ou d'estevenens à une foiz ensamble nous sumes tenue et devons baillier et delivrer adit Hugue et à ses hoirs ou à son comandement senz nulle dilaccion faire et senz empachement mettre la maison fort de Regne et toutes les choses dessus devisées que lidiz Hugues nous a assis et delivrey pour lesdites doux cenz livrées de terre Et par ensi [] En tesmoignaige de laquel chose nous avons mis nostre grant seal pendant en cex presentes lettres et havons requis et supplié honorable persone et discrete l'official de la court de Besençon que il vuille metre le seal de ladite court de Besençon en cex presentes lettres ensamble nostre grant seal Faites et donées le mardi après les Bordes l'an mil trois cenz dix et huit presenz mons Guillaume Galois bailliz mons de Chalon Hombert de Bletterens chestelain de Cusel maistre Mathé Palanchart mons Drue de Coine juge mons de Chalon et maistre Estene de Bletterens clerc tesmoing à ce apelez especialment et requis