Charter Document - 02220617

Je Huguenins de Chanvens chenoines de Lausanne fais savoir à touz que come nobles bers et puissanz mes très chiers et redotez sires messires Hugues de Chalon sires d'Allay heut mis en sa main après la mort Jehan de Chanvent mon nevour les choses cy dessoz nommées et specifiées lesquex lidiz Jehans de Chanvent avoit doné adit mons Hugue se lidiz Jehans moroit senz enfant loiaux et naturaux nez et procreez de son propre cors ensi con lidiz messires Hugues le disoit c'est à savoir sa maison fort de La Mure la vile les homes les mex et toutes les appartenances et appendises doudit leu encor sa maison d'Allay assise devant le donjon delez la maison es hoirs mons Point de La Baume encour touz ses homes d'Allay taillables et censiers de quelque condicion qu'il soient ensamble lour mex et les censes et toutes les appartenances et appendises encor quatre vinz et dix livrées de terre lesquelles lidiz Jehans avoit assises ou pois de Salins sus le communal de la salnerie lesquex choses lidiz Jehans mes nies tenoit doudit mons Hugue en fié lige encor unze cenz livres des deniers doudit Jehan lesquex choses je demandoie adit mons Hugue come plus pruchains hoir doudit Jehan mon nevour lesquex choses lidiz messires Hugues ne me voloit delivrer ainz les voloit retenir à luy pour la cause de la donacion dessusdite à la parfin est acordey et promis entre lesdiz mons Hugue d'une part et Huguenin devantdit d'autre part pour bien de pais et de acorde et pour oster toute rancure et toute matiere de discorde et especialment pour ce que je suis bien certains de la donacion faite doudit Jehan de Chanvens adit mons Hugue en la maniere qui dessus est dit et devisey que pour les raisons et la cause dessusdites demorent adit mons Hugue pour luy ses hoirs et ses successours et pour ces qui de li auront cause pour touzjours mais permaignablement les choses qui s'ensuegnent c'est à savoir li devantdite maison d'Allay encour tuiz li devantdiz homes que Jehans de Chanvens havoit [à] Allay taillables et censiers ensamble lour mex et les censes et autres mex se point en y havoit à abergier et toutes les appartenances et appendises exceptez fiez se il y estoient encor les quatre vinz et dix livrées de terre assises ou puys de Salins sus le communal de la salnerie se je moroie senz enfanz nez et procreez de mon propre cors loiaux et naturaux en celui caux lesdites quatre vinz et diz livrées de terre li demoroient pour luy ses hoirs et ses successours et ces qui de luy hauront cause pour touzjorsmais permaignablement et demourent ausi adit mons Hugue pour luy ses hoirs et ses successours perpetuelment lesdites unze cenz livres Et à moi dit Hugonin demorent les choses cy après dites et specifiés lesquex je tien et confesse moy tenir en fié lige doudit mons Hugue de Chalon signour d'Allay c'est à savoir lesdites quatre vinz et dix livrées de terre assise[s]ou pois de Salins sus le communal de salnerie de Salins en la maniere que dessus est dit et devisez encor Li Mure c'est à savoir li maison fort li vile li homes li mex et toutes les appartenances et appendises doudit leu de La Mure en la maniere et forme que lidiz Jehans de Chanvens mes niex y tenoit c'est à savoir ce que je lidiz Jehans y tenoit encor li vigne d'Allay vulgament apelée la vigne de Trentevenz ensamble la maison que maistre Richars soloit tenir et les fiés lesquex Jehans mes nies havoit [à] Allay se acuns en y havoit totes les choses dessusdites lidiz messires Hugues havoit mis en sa main pour la cause dessusdite De rechiez est acordez et promis entre ledit mons Hugue d'une part et moy dit Hugonin d'autre que je li doi aidier contre touz et receter en mes chestiaux et en mes maisons contre touz toutes foiz que li plera Et se ansi estoit que lidiz messires Hugues me meist en guerre il me devroit aidier et se je estoie assegiez il me devroit secorre et se il ne me secorroit et je y perdisse riens pour son deffaut il me devroit emender à regart de proudomes et se il me met en guerre il me doit metre en pais Prometanz je lidiz Huguenins En tesmoignaige et en force de toutes les choses contenues en ces presentes lettres je li devantdiz Hugonins de Chanvens ay prié requis et supplié honorable home et discreit l'official de la court de Besençon par Estene diz Humbert de Chestel Challon clerc publique notaire de l'auctorité l'apostoille et l'emperaour et juré de ladite court de Besençon que il mete son seal en ces presentes lettres Et nous lidiz official Ce fut fait à Joigne le londi huictive des apostres saint Phelippe et saint Jaique l'an Nostre Seignour mil trois cenz dix et huit presenz nobles homes et saiges mons Richart de Mongnet seignour de Monsajon mons Guillaume diz Gallois d'Allay chevaliers tesmoing es choses dessusdites apelez et requis Et je Estienes []