Charter Document - 02220616

Nous Mahaut contesse d'Arthois et de Bourgoigne palatine et dame de Salins faisons savoir à touz que nous attendanz et consideranz les bons et agreaubles servises que nostre chiers cousins messires Hugues de Chalon sires d'Allay nous a fait ou temps passé et que nous esperons que il nous face ou temps à venir li avons doné et outroié donons et outroions à sa vie tant soulement nostre chesteal de Choques lequel nous acqueimes dou chestelain de Lens et de la chestellaine sa fame à tenir de nous en foy et en homaige jurable et rendable ansi com il le tenoient de nous Et li donons encor à sa vie cinc cenz livrées de terre à tornois [à tenir] de nous en foy et en homaige ausi en l'assiete desquelles cinc cenz livrées de terre à tornois nous li baillons et delivrons de maintenant toute la terre qui nous vient en fourfaiture de mons Jehan de La Chaucie chevalier jadis en quoy que elle soit assise soient terres prez eaues cens justice et signorie et en quelque autre chose que elle soit assise par costume de pais exceptez les fiés les homaiges et la haute justice que nous retenons par dever nous en ladite terre en tel maniere que se ladite terre par le raport de ceus que nous havons commis ou commetrons à presier la n'estoit ou pris et en la valour de cinc cenz livres tournois de rente per an nous li prometons le remanant que en deffaudroit à asseoir aillours en leu convenable jusque à la somme de l'acomplissement des cinc cenz livres tornois de rente par an dessusdites Desquelx chestex et cinc cenz livres tornois de rente il est entrez en nostre foy et en nostre homaige en la maniere dessusdite et nous en a fait seirement de feauté En tesmoignaige de laquel chose nous havons fait metre nostre seal en ces presentes lettres donées l'an de grace mil trois cenz dix et nuef le vint et siesme jour d'aoust