Charter Document - 02220615

Sachent tuit cil qui verront et orront ces presentes lettres que come descors guerres contemps quereles et controverses plusours fuissent entre noble baron et poisant mons Hugue de Chalon d'une part et noble home et saige mons Pierre de Grantson seignour de Belmont d'une part et especialment sus ce que lidiz messires Pierres disoit et affermoit que lidiz messires Hugues avoit fermey le chestel de Franchestel ou grief et ou prejudice doudit mons Pierre et que cil chesteax appertenoit à luy par raison des appartenances de son chesteal de La Sainte Croiz laquel chose lidiz messires Hugues ne li conoissoit mie ainz disoit ledit chesteal de Franchesteal apertenir à luy par plain droit et sus plusours autres greuses injures et domaiges que li une partie demandoit à l'autre finalment amis communas entrevenanz bone paix acors et transactions sont et ont estey faiz entre lesdites parties sus toutes greuses quereles guerres contems descors controverses injures rancours et domaiges que li une partie demandoit et pooit demander à l'autre et havoir envers l'autre partie de droit de fait et en toutes autres causes et manieres en la forme et en la maniere que s'ensuet Premierement par ledit acort lidiz sires de Belmont est devenuz hons doudit mons Hugue et est entré en sa foy et en son homaige de fief perpetuel saves les feautés et homaiges des nobles barons et poissanz mons le conte de Savoye et de mons Lois de Savoye signour de Veaud et de reverand pere en Jhesus Crist mons l'evesque de Losanne et encores saves les feautez et homaiges lesquex il havoit à faire pour la succession et heritaige dou seignour de Granson es seignour desquex li sires de Granson tient ou doit tenir en fief à jour de huy Et tient et tiendra lidiz sires de Belmont en fiez doudit mons Hugue certaines choses cy après devisées et declairiés Et demuere et demorra adit mons Hugue pour luy ses hoirs et ses successours perpetuelment franchement et quittement en plaine possession proprietel justice et signorie haute et basse mere et mixte impere juridiction et simple cohercion et par tout plain droit lidiz chesteal de Franchesteal ensamble la place d'anviron ledit chestel tel come lidiz messires Loys a ordeney firmetey et mis boines pour faire ediffices et toute sa volunté franchement Mais se lidiz messires Hugues sui hoirs ou sui successours façoient oudit chestel ou en ladite place bourg vile fours ou molins et quelque autre chose que ce fut en quoi rentes ou yssues venissent d'autres persones que de la maignie propre et familliers doudit mons Hugue demorant oudit chestel et en ladite place ou dou chestelain qui garderoit ledit chestel et ladite place por ledit mons Hugue ycelles rentes et yssues seroient et seront communaux oudit mons Hugue et oudit mons de Belmont et à lours hoirs mais toutes rentes et yssues profiz et emolumenz qui seront oudit chestel et en ladite place por la necessité et les us necessaires doudit mons Hugue et de sa propre maignie dessusdite et propres familliers ou de son chestelain qui garderoit ledit chestel et ladite place pour ledit mons Hugue et ses hoirs et ses successours et des alanz et vignant oudit chestel seront adit Hugue et à ses hoirs et à ses successours senz partie et contradiction doudit seignour de Belmont ses hoirs et ses successours Encor est acordey entre lesdites parties que les boines qui distinguent et divisent le Franchesteal et la communaltey cy après escripte d'une part et la chestellenie de La Sainte Croiz d'autre part sunt tex c'est à savoir dois le pertuis des Estroiz par le piez de la montaigne desdiz Estroiz en tendant par le pié d'ycelle montaigne jusque lay où li aigue dou biez qui vient par devant lesdiz Estroiz se conjoint à la Noire Aigue et dois anqui en aval touzjours le font de la valée juque à la terre au seignour de Nuef Chestel et dois lidiz pertuis desdiz Estroiz en entranz dedenz lesdit Estroit entre le roichet desdiz Estroiz qui est devers venz et le pié de la Grant Montaigne en tendant le fon de la combe envers la terre de Baumes et la terre de Joigne Encor est acordez entre lesdites parties que toutes les choses soient bois plains champs prel villes fermes non fermes habitanz homes bours revieres aigues descours d'aigues rentes yssues et provenz et generalment toutes autres choses corporex et incorporex nos droiz et accions quelx que elles soient et puissent estre aquises et acquerir par lesdiz mons Hugue et lediz seignour de Belmont et chescun d'eaux et lours hoirs ensamble toutes justices hautes et baisses grant et petites mere mixte impere juridicion grant et petite et simple cohercion et execucion et touz profiz et emolumenz quex que il soient presenz et à venir qui sunt et qui por le temps seront dois lesdites boines qui departent le Franchestel et la communatel cy escripte et la chestelenie de La Sainte Croiz d'une part et tegnant droit tanque à la terre au seignour de Nuefchestel et à la terre au seignour de Jour et à la terre de Joigne et à la terre de Baumes demorent sont et seront communalx audit mons Hugue et à seignour de Belmont lour hoirs et lour successours en toutes choses saul et exceptey tant seulement ledit Franchestel et ladite place qui demoure adit mons Hugue perpetuelment et quittement si com dessus est dit Et est encor acordey entre lesdites parties que li prez où fauz ont corruz et champs qui sunt mis à couture doyvent revenir es homes de La Sainte Croiz qui devant ce que lidiz Franchesteal fut fermez les tenoient par paient la cense que il paioient devant liquel cense sera communalx entre lesdiz mons Hugue et le seignour de Belmont lour hoirs et lours successours et ce qui n'est acensiz autre froiz sera acensiz et bailliez par les doues parties Et a lidiz messires Loys ordoney place pour faire un bourg qui sera communalx entre lesdiz mons Hugue et le seignour de Belmont Et tout ce que lidiz sires de Belmont sui hoirs et sui successours ont et haveront en ladite communaltey dois lesdites boines qui departent le Franchestel et la communaltey dessusdite et la chestellenie de La Sainte Croiz si com dit est envers la terre de Nuefchestel la terre de Jour la terre de Joigne et la terre de Bames sont et seront dou fié doudit mons Hugue et le tient et tanra doudit mons Hugue ses hoirs et ses successours lidiz messires Pierres suy hoirs et sui successours saves les autres fealtez dessusdites si com dit est Et encor avec ce tient et tanra et devra tenir lidiz sires de Belmont sui hoirs et sui successours de fiez perpetuel doudit mons Hugue ses hoirs et ses successours vint et cinc livrées de terre qui seront assises en et sus la ville de Suchie de la chestellenie de Belmont en et sus les rentes les homes et lour mex que lidiz sires de Belmont y ha et se elles ne pooient estre assises soffisaument sus et en ce que lidiz messires Pierres ay à Souchie lidiz sires de Belmont doit parfaire l'assise desdites vint et cinc livrées de terre en et sus la ville des Espindes en et sus ce que lidiz sires de Belmont y ha Encor est acordey entre lesdites parties que dois lesdites boines qui departent le Franchestel et la communaltey dessusdite et la chestelenie de La Sainte Croiz lidiz messires Hugues sui hoir ne sui successours ne se puissent ne doient acrestre en toute la chestelenie de la Sainte Croiz en proprieté possession fiez rierefiez demeneures ne en autre maniere quex qu'elle soit ne recevoir havoir retenir ne reclamer dedenz ladite chestelenie de La Sainte Croiz dois lesdites boines qui departent le Franchestel et ladite communaltey et la chestellenie de La Sainte Croiz bourgois comanz ne guerdeeins ne homes de ladite communaltey ne autre part tant come il demorroient en ladite chestelenie de La Sainte Croiz Toutevoie est acordé entre lesdites parties que li habitanz de Franchestel et de la place contiguee oudit chestel et de ladite communaltey pevent et porront pasqueier lour bestes le plus haut de la montaigne qui est entre le Franchestel et le chestel de La Sainte Croiz en aval tant con aigue pent devers Franchestel et devers ladite communaltey Et encor cil de la chestellenie de La Sainte Croiz pourront pasqueier lour bestes dois le haut de ladite montaigne envers Franchastel et par toute la terre de ladite communaltey senz faire domaiges Et hauront lidiz messires Hugues et ses hoirs et successours sires de Franchastel et sa famme quant il seront personelment conjunctement ou devisement à Franchestel l'affoaige et l'usaige en touz bois et leux pour la necessitey de lour hostel de Franchestel et de lours maignies et li chestelains de Franchestel quant lidiz sires n'i seroit pour luy et pour sa maignie senz toute fraude et en bone foiz senz vendre et senz doner mais pour user oudit chestel de Franchestel es bois et es leux qui sunt et seront dois le plus haut de ladite montaigne envers Franchestel et envers ladite communaltey ce exceptey que lidiz chestelains de Franchestel ne porroit prendre ne user esdiz bois et leux de sapins masles ne femesles ne de foux ne en chasne se il n'estoit cheuz ou abatuz Et sera mis uns hons communalx par le consentement des doux parceniers pour governer exercer et tenir la jurisdiction et la justice grant et petite desdites choses communalx et de ladite communaltey et pour conoistre et faire toute execucion et lever emendes quant elles y afferront liquel jurera quant il y sera mis novelement que il gardera et fera le profit communal desdiz parçoniers et lour gardera et tanra lour droit et à chescun bien et loialment sen nul emporter Et chescun desdiz parçoniers y metra cui luy plera pour reçoivre ses autres rentes et issues de ladite chose communal saul et retenuz adit mons Hugue ses hoirs et ses successours ses peaiges et les droiz d'ycex se acuns en ha de droit esquelx il ne renunce ne taisiblement ne espressement per chose et per parole qui soient contenues en cestes covenances et en ces lettres Et parmi ce bone paix et bone fins est et doit estre à touzjours mais ferme et estauble entre lesdites parties de tout ce que il hont heu à faire jusqu'à jour de huy et de toutes et touz les greuses quereles guerres contens descors controverses injures rancours et domaiges dessusdiz pour lour et pour lour homes et pour touz lour aidanz et nommeement pour le signour de Granson et touz autres aidanz de l'une partie et de l'autre Et se riens havoit en cestes lettres d'oscur ou à desclairier lidiz messires Loys apelez doux chevaliers de chescune partie le porra declairier [] Et à plus grant seurtey lidiz messires Lois pour lui ses hoirs et ses successours s'est estaubliz plages et principal rendierres pour l'une partie et pour l'autre [] En tesmoignaige de laquel chose et à plus grant seurté nous Hugues Loys et Pierre dessusdiz avons mis noz seaux en ces presentes lettres [] Doné le londi après feste sainte Lucye l'an MCCC dix et nuef presenz nobles homes et poissanz messignours Rool signour de Nuefchestel Richart signour de Monsajon Jaiques signour de Monrichier Renaut d'Estavayer Jehan de Ceys Guillaume Morraille de Charencey Guillaume Galois d'Allay chevaliers mons Amey de Montagu chenoine de Besençon et Jehan de Rossillon chenoine de Lousanne tesmoings à ce desdiz notaires especialment appelez et requis