Charter Document - 02220614

Nos Petrus de Eschalone canonicus Valentie officialis curie Lugdunensis notum facimus universis presentes litteras inspecturis quod cum questio verteretur seu verti speraretur inter nobiles et potentes dominum Johannem dalphinum Viennensem comitem Albonie dominumque de Turre pro se Johanne de Albaspina et Guillermo fratre suo et domina Katherina de Montelupello domina Cuyselli et eorum quolibet et quolibet eorundem ex una parte et dominum Hugonem de Cabilone dominum de Allato ex altera super eo videlicet quod prefatus dominus dalphinus dicebat et asserebat turrem castrum villam territorium et mandamentum Cuyselli ad eum pertinere et pertinere debere ex concessione donatione seu in facto datione sibi factis rite et legitime de predictis rebus a domino Johanne quondam domino Cuyselli nec non ex concessione donatione seu in facto datione sibi post mortem dicti Johannis factis de predictis a domina Katherina predicta et Johanne de Albaspina et Guillelmo fratre suo et eorum quolibet et quod nihilominus illa que dominus Johannes dominus Cuyselli tenebat de alodio suo in territorio et mandamento Cuyselli extra metas dicte franchisie concesserat idem dominus dalphinus in feodo dicte Katherine predicte in quibus omnibus et singulis dicebat prefatus dominus dalphinus dominum Hugonem de Cabilone predictum impedimentum opponere et quamplura de predictis minus juste detinere in domini dalphini et prefate domine et aliorum predictorum prejudicium et jacturam prefato domino Hugone contrarium asserente et dicente prefata omnia et singula ad se ex causis justis et licitis pertinere tandem amicis communibus intervenientibus inter predictos super predictis omnibus et singulis in modum qui sequitur extitit concordatum videlicet quod turris castrum villa et burgus de Cuysello cum omnibus fortaliciis suis muris fossatis et omnibus et singulis rebus intra metas franchisie de Cuysello existentibus remanent et remanere debent perpetuo et in hereditatem perpetuam domino Hugoni de Cabilone predicto et suis successoribus absque domini dalphini et domine Katherine de Montelupello Johannis de Albaspina Guillelmi fratris sui et heredum ac successorum suorum et cujuslibet eorum reclamatione quacumque sic tamen quod dominus Hugo predictus domino episcopo Matisconensi et domino duci Burgundie et eorum cuilibet prout ad eorum quemlibet spectat debitum homagium facere teneatur Item remanent eidem domino Hugoni pro se et suis heredibus et successoribus in hereditatem perpetuam omnes res que sunt de feodo ducis Burgundie site in castro villa territorio et mandamento Cuyselli quecumque sint si que sint et quocumque nomine censeantur nec non et omnes res quas dominus Johannes quondam dominus Cuyselli tenebat seu tenere debebat a dicto domino Johanne in feodum quocunque nomine nuncuperentur Item omnes res et jura quas et que dominus Johannes quondam dominus Cuyselli de alodio proprio tenebat que videlicet non erant nec esse debebant de feodo ducis Burgondie seu alterius domini cujuscumque remanent dicto domino Hugoni pro se et successoribus suis in feodum perpetuum quas et que tenebit dictus Hugo et heredes sui universales in feodum a domino dalphino predicto et successoribus suis dalphinis Viennensibus Et de dictis alodiis existentibus in pratis campis vineis cartis decimis reditibus obventionibus servitiis hominibus talliabilibus et non talliabilibus feodis et retrofeodis homagiis fidelitatibus mero et misto imperio juriditione et cohertione gardis hominibus resortis et aliis rebus corporalibus et incorporalibus alodialibus tamen devestivit se dicta domina Katherina que predicta alodia tenebat in feodum a dicto domino dalphino et dictum dominum Hugonem de predictis de consensu de voluntate auctoritate et mandato dicti domini dalphini presentialiter investivit ac dictus dominus Hugo de predictis alodialibus intravit homagium predicti domini dalphini et eidem fidelitatem de et pro eisdem fecit in fidelitatibus et homagiis consuetam et de eisdem dictus dominus dalphinus eundem dictum dominum Hugonem in feodum et tanquam de feodo suo presentialiter investivit Et vice versa dictus dominus Hugo ex causa transactionis et concordie et pro jure et actione quod et quam dicta domina Katherina habebat seu habere poterat jure suo proprio vel etiam ex successione domini Johannis domini quondam Cuyselli filii sui vel alio quoquo modo causa seu ratione in turre castro burgo villa muris fossatis fortalitiis territorio et mandamento Cuyselli ac in omni successione filii sui predicti tam non feodalibus quam feodalibus nec non alodialibus seu aliis quibuscumque ubicumque sint in dictis locis vel alibi quocumque nomine censeantur dedit cessit et concessit in recompensatione predictorum eidem presenti et recipienti in feodum trecentas libratas annui redditus habendas seu levandas ab eadem apud Fontains vel in propiori loco de Fontain prope Arguellum una cum domo forti ibidem existente que apellatur Li Bousee in hunc modum videlicet quod dicta domina Katharina habeat et possideat in feodum ad vitam suam duntaxat domum predictam et ducentas libras annui redditus viennensium et alias centum libras possit dicta domina dare et de eisdem ordinare et easdem habere et sue erunt in feodum perpetuum pro sua voluntate omnimoda facienda Sane predictus dominus Hugo poterit dictas centum libras annui redditus rehabere ubicumque easdem transferre contingeret ab eadem pro mille libris turonensium et solvendo mille libras turonensium eis quibus dicte centum libre annui et perpetui redditus essent ab eadem relicte Et post dicte domine decessum dicta domus de La Bouse dicte ducente libre annui redditus sine omni pecunie solutione nec non et alie centum libre pro mille libris turonensium predictis solutis et non ante ad dictum dominum Hugonem et successores suos pleno jure revertantur et tunc eas capere occupare et sibi retinere propria auctoritate poterunt sine juris et judicis offensa omni contradictione cessante Item prefatus dominus Hugo promisit eidem domine Katharine dare et solvere ex causa predicta et pro predictis duo millia libras turonensium solvendas sibi domine Katharine in hunc modum videlicet mille et quingentas libras a dicto domino dalphino Viennensi pro dicto domino Hugone de tribus millibus librarum turonensium in quibus dominus dalphinus tenetur dicto domino Hugoni prout inferius continetur et alias quingentas libras in festo Omnium Sanctorum proximo venturo de et pro quibus quingentis libris dictus dominus dalphinus se constituit fidejussorem in manum dicte domine Katharine pro dicto domino Hugone et ad ejus requisitionem et principalem debitorem et solutorem Item pro eo quod dictus dominus Hugo recepit in feodum illa que fuerant alodia predicta a dicto domino dalphino ut supra dictum est dictus dominus dalphinus promisit eidem domino Hugoni presenti et recipienti tria millia librarum turonensium quas eidem solvere integre promisit hiis terminis videlicet quod dictus dominus dalphinus satisfaciet dicte domine de mille et quingentis libris in quibus dictus dominus Hugo tenebatur eidem domine Katharine de duobus millibus librarum supra dictarum et eundem dominum Hugonem de dictis mille et quingentis libris a dicta domina faciet liberari et eundem dominum Hugonem de eisdem servabit indempnem et quingentas libras solvet dictus dominus dalphinus eidem domino Hugoni incontinenti alias vero mille libras solvet dictus dominus dalphinus dicto domino Hugoni seu ejus mandato infra octabas festi beati Johannis Baptiste proxime venturi in burgo Montis Regalis cum omnibus dampnis et interesse de perditis et coustamentis ac etiam expensis quas et que dictus dominus Hugo sustineret vel incurreret occasione dicte pecunie suo termino non solute Et per hec et hiis mediantibus prefatus dominus dalphinus pro se et Johanne de Albaspina et Guillelmo fratre suo et domina Katherina de Montelupello et eorum quolibet quittaverunt et remiserunt pro se et heredibus et successoribus suis dicto domino Hugoni presenti stipulanti et recipienti pro se et heredibus suis quidquid juris reclamationis et actionis habebant seu habere poterant conjunctim vel divisim in rebus predictis omnibus et singulis que dicto domino Hugoni remanent ut predictum est et ad ea et de hiis fecerunt eidem pactum expressum de non petendo et liberaverunt eundem pro aceptillatione aquilliana stipulatione precedente salvo et retempto domino dalphino et suis in perpetuum feodo fidelitate homagio alodii memorati prout superius est expressum Item concordatum est etiam per modum transactionis et concordie quod omnia illa que tenentur et que prefatus dominus Johannes dominus de Cuisello tenebat extra metas franchisie de Cuisello de feodo domini comitis Autissiodorensis domini Sancti Laurentii de Rupe domini Odardi de Sabaudia et aliorum dominorum quorumcumque seu que teneri debent a predictis dominis sint et esse debeant quantum ad proprietatem et dominium pleno jure et cum suis juribus pertinenciis et appendiciis universis dicti domini dalphini et suorum successorum in perpetuum pro sua voluntate facienda omnimode et quod in illis predictus dominus Hugo nihil exigere vel petere possit vel quomodolibet vendicare exceptis hiis que prefatus dominus de Cuisello immediate tenebat vel tenere debebat a domino duce Burgundie vel domino Hugone predictis vel altero eorumdem Item dominus dalphinus hoc faciet firmum et stabile pro se Johanne de Albaspina Guillelmo fratre suo et pro domina Katherina de Montelupello predicta et garendiet eundem dictum dominum Hugonem et deffendet et pacificabit contra eos et eorum quemlibet et tradet etiam litteram quittacionis per quam apparebit quod dominus de Mernay seu uxor sua nichil poterunt petere de jure seu exigere in predictis que remanent dicto domino Hugoni Item si contingeret aliquid in predictis peti a liberis Guillelmi de Corent quos suscepit a sorore quondam domini Johannis domini quondam de Cuisello predicto dominus dalphinus pro se domina Katherina Johanne de Albaspina et Guillelmo fratre suo predictis et dictus dominus Hugo de Cabilone predictus tenebuntur defendere et in missionibus conferre et contribuere et in omnibus predictis que liberi predicti domini Guillelmi exigerent de predictis quilibet pro rata quam de hereditate et bonis predictis et pro recompensatione eorumdem haberet habebit seu habebunt Que omnia [] In quorum omnium robur et testimonium nos officialis predictus ad preces et requisitionem dictarum partium nobis pro eis oblatas per predictum juratum nostrum [] sigillum nostrum una cum sigillis dictorum domini dalphini et domini H de Cabilone presentibus litteris duximus apponendum Actum et datum apud Cusellum presentibus domino Radulpho domino Novi Castri domino Richardo de Castellione domino Girardo de Pontevero domino Petro de Balma militibus domino Homberto de Vallibus domino Guidone Badeti et domino Drueto de Cuneo legum professoribus testibus [] Datum septima die maii anno Domini millesimo CCC decimo septimo Et ego predictus juratus presentes litteras expedivi sub signo meo Nos vero Dalphinus et Hugo de Cabilone predicti ad omnium premissorum majorem firmitatem habendam presentes litteras una cum sigillo dicti officialis et signo notarii supra scripti sigillis nostris fecimus communiri