Charter Document - 02220611

Nous Katheline de Joinvile dame d'Andelot faisons savoir à touz que come nobles honz et puissanz nostres chiers et bien amez sires messires Hugues de Chalon sires d'Allay nous ait bailliez et delivrey pour nous et pour noz hoirs les viles de Doy et dou Cherbony et le molin Dampjehan assis ou val de Myeges ensamble toutes les appartenances pour sexante cinc livrées de terre à tornois pour raison de l'eschange et permutacion fait par nous adit Hugue pour luy et pour ses hoirs de la maison fort de Varenes ensamble toutes les apartenances esdites sexante cinc livrées de terre par ensi come plus plenierement est contenuz es lettres sus ce faites seelées dou seal de la court de Besençon dou grant seal doudit Hugue et de nostre grant seal nous cognoissons et confessons en veritey que en ceste assise façant lidiz Hugues nous a bailliez et delivrey cinquante soudées de terre encontre lesdites sexante cinc livrées de terre pour ce que bonement ne les povoit despartir desdites sexante cinc livrées lesquex cinquante soudées de terre nous prometons en bone foy asseoir et assigner à regart de proudomes oudit val de Meges adit Hugue à la requeste de luy ou de ses genz Et est à savoir que en ladite assise desdites sexante cinc livrées de terre façant lediz Hugues a retenuz à luy et à ses hoirs le meys Benoitet dou Cherbony ensamble toutes les appartenances Encor est à savoir que se lidiz Hugues ou cil qui cause auront de luy nous baillent et delivrent cenz et diz livres d'estevenens deanz la feste saint Andrey pruchainement venant nous sumes tenus et devons reprandre doudit Hugue et de ses hoirs en acressance de l'autre fiez que nous tenons de luy lesdites sexante cinc livrées de terre que assis nous a ou vaul de Meges Et toutes ces choses En tesmoingnaige de laquel chose nous avons mis nostre grant seal pendant en ces presentes lettres données à Cuseal le mecredi après les Bordes l'an mil CCC et dix huit