Charter Document - 02220610

Nos officialis curie Bisuntine notum facimus universis quod coram Jacobo de Talenayo clerico auctoritate imperiali publico notario jurato mandato nostro ad hoc a nobis specialiter destinato cui quantum ad infra scripta et ad majora vices nostras commisimus et committimus per presentes litteras et fidem super hiis adhibemus pleniorem propter hoc in jure coram dicto mandato nostro personaliter constitutus Ferricus de Castellione domicellus confessus est in jure et publice recognovit se esse et debere esse hominem fidelem illustris et potentis viri domini Hugonis de Cabilone domini de Allato et heredum suorum et eidem domino Hugoni et heredibus suis fecit homagium et fidelitatem et ipsius homagium intravit pro se et heredibus suis et fidelitatem veri homagii [per] sacramentum ad sancta Dei evangelia corporaliter prestitit et promisit sollempni stipulacione dicto mandato nostro ut publice persone nomine dicti domini Hugonis et heredum suorum stipulanti sub virtute et vinculo prestiti sacramenti dicto domino Hugoni et heredibus suis tanquam vero domino servire et obedire et ea omnia et singula adimplere atque peragere erga dictum dominum Hugonem et heredes suos que homo fidelis domino suo virtute fidelitatis et homagii peragere et adimplere tenetur sub expressa hypotheca et obligacione omnium et singulorum bonorum suorum quorumcumque et quocumque nomine censeantur A quo quidem domino Hugone dictus Ferricus confessus est in jure coram dicto mandato nostro et publice recognovit se habuisse et recepisse proinde centum libras stephaniensium bonorum et legalium in bona pecunia legitime numerata et in utilitatem ipsius Ferrici totaliter conversa quam quidem summam pecunie seu hereditatem valoris dicte summe pecunie dictus Ferricus confessus est in jure coram dicto mandato nostro et publice recognovit se tenere pro se et heredibus suis in feodum a dicto domino Hugone et heredibus suis deinceps et perpetuo promittens dictus Ferricus per juramentum suum jam prestitum dictum feodum expedire et pacificare ab omni persona et personis et quolibet alio domino et universitate propriis sumptibus missionibus et expensis nec non omnia et singula facere adimplere et inviolabiliter observare et non contravenire in futurum tacite vel expresse renuncians in hoc facto dictus Ferricus fide data expresse omni exceptioni doli mali circonventionis deceptionis lesionis actioni in factum quod metus causa condicioni sine causa vel minus causa sufficienti copie presentis instrumenti exceptioni dicte summe pecunie non habite non recepte non numerate et in utilitatem suam non converse exceptioni dicti homagii non sic facti reique ita non geste et generaliter omnibus exceptionibus juris [et] facti canonici et civilis que contra tenorem presentium vel hoc factum possent obbici vel opponi juri dicenti generalem renunciationem non valere volens et concedens dictus Ferricus quod nos ad observationem omnium et singulorum premissorum per excommunicationis sententiam et per bonorum suorum captionem simul et semel compellamus et compelli faciamus et mandemus exceptione aliqua non obstante Predicta omnia et singula prout superius sunt expressa confessus est dictus Ferricus in jure coram dicto mandato nostro esse vera et ita esse acta et gesta In cujus rei testimonium ad requisitionem dicti Ferrici nobis factam et relatam per dictum mandatum nostrum sigillum curie Bisuntine presentibus litteris duximus apponendum Datum et actum presentibus dominis Gerardo de Vaites Richardo de Castellione militibus et pluribus aliis testibus ad hec specialiter vocatis et rogatis die jovis post festum Penthecostes anno Domini MCCC decimo septimo