Charter Document - 02220609

Nous Eudes dux de Bourgoingne faisons savoir à touz que comme nostre amé cousins et feauz messires Hugues de Chalon sires d'Arlay pour lui Jehan son frere dame Ysabel sa suer et pour mons Loys de Savoye signour de Waut mari de ladite Ysabel en tant com il li puet appartenir pour raison de sadite feme pour eux leurs hoirs et leurs successours nous ait fait plusours convenances acors et quittances generaux et especiaus tant par lettres quant senz lettres par lesquex se il et elles estoient et estoit gardez et gardéez ensi com elles sont faites et faiz il ne nous porroit mie demander ne exiger de nous les choses qui s'ensuignent lesquex toutevoie furent exceptées expressement esdites covenances acors et quittances nous willanz reconnoistre et ouvrer de bonne foi connissons publiement les choses qui s'ensuignent estre et avoir esté exceptées expressement dez et esdites covenances acors et quittances premierement que non obstant toutes autres convenances quittances et touz acors jadiz faiz entre nous nous pour nous noz hoirs et noz successours prometons adit Hugue pour lui ses hoirs et ses successours asseter et asseoir tant pour lui que pour ledit Jehan son frere ladite Ysabel et ledit Loys pour sadite feme et delivrer et parfaire entierement tout ce qui est à asseoir et à parfaire des convenances et de l'acort jadiz fait entre mons le duc Robert dont Diex ait l'ame nostre très chier pere d'une part et mons Jehan de Chalon jadiz signour d'Arlay pere doudit Hugue pour raison de madame Margarite de Bourgoingne jadiz nostre chiere tante qui fut feme mons Jehan dessusdit et ladite Marguerite d'autre part et especialment selonc la pronunciacion de noble memoire madame Margarite jadiz reyne de Jherusalem et de Sezile faite sur ledit acort et les lettres seur ce faites et rendre et delivrer les arrierages et retenues ce que n'en seroit paiez de ce qui est à parfaire de la terre qui devoit estre assize adit Jehan pere doudit mons Hugue pour sadite feme selonc ledit acort par lequel acort lidiz Jehans pere doudit Hugue et lidite Margarite sa feme et mere doudit Hugue heurent Vietiaus ensi com il est contenut esdites lettres seur ledit acort faites Et encor esdiz acors convenances et quittances faiz à nous doudit Hugue pour lui et les dessusdiz si com dit est fut excepté expressement que nous devons paier adit Hugue de Chalon ce qui est demoré à paier d'aucuns debtes dont lettres sont esquex nostre chiers peres li dus Robers et nostre chiers freres li dus Hugues conjunctement ou deviseement estoient tenus ou obligiez adit mons Jehan de Chalon et à sadite feme conjunctement ou diviseement ou adit mons Jehan de Chalon jadiz tant pour raison de sadite feme quant pour raison de lui dezquex lidiz Hugues de Chalon est hoirs Lesquex choses toutes ensamble et une chascune par ly nous pour nous noz hoirs et noz successours prometons [a]dit Hugue present et recevant pour lui ses hoirs et ses successours en bone foi et par stipulacion solempnel et par nostre serement donné corporelment sus sains ewangiles et sus la expresse obligacion de noz biens tenir acomplir parfaire et delivrer les choses dessusdites en la maniere dessusdite et que nous [ne] irons encontre taisiblement ne expressement en jugement ne defuer En tesmoing de ce nous avons mis nostre grant seel pendant en ces lettres faites et données à Beane le dymenche après la saint Barthelemy l'apostre l'an MCCC et dix sept