Charter Document - 02220607

Nous Eudes dux de Bourgoigne et nous Hugues de Chalon sires d'Allay faisons savoir à touz [] que come plusours descors dissensions questions quereles controverses et debaz fussient entre nous ou peussent estre nous pour bien de paix et pour grant deliberacion de nostre consoil nous sumes acordez en la maniere que s'ensuet c'est à savoir que nous Hugues dessusdiz pour nous Jehan nostre frere madame Ysabeal nostre suer et mons Loys de Savoye son mary en tant come il li puet appartenir pour raison de ladite Ysabeal sa fame et pour madame Byatrix contesse de La Marche nostre chiere tante desquex et pour lesquex nous nous sumes fait fors et avons pris à main quant à ce que s'ensuet en tant come il lour touche et puet et doit touchier et appartenir conjunctuntement ou diviseement quittons et avons quittey baillons et avons bailliez façons et avons fait cessions de nostre certaine science pour nous et pour noz hoirs ou successours et pour cex qui de nous auront cause perpetuelment parmi les covenances qui s'ensuegnent ledit mons le duc et adit mons le duc present et recevant pour luy et pour ses hoirs ou successours et pour ces qui de luy auront cause perpetuelment tout le droit et raison accion real et personel miste [et toute] persecucion et toute autre reclamacion que nous Hugues dessusdiz Jehans Ysabeaux et lidiz Loys ses mariz et Beatrix dessusdiz avons hont povons ou povent et devons et doivent avoir conjunctuntement ou diviseement envers mons le duc dessusdit et contre luy ses freres et suers et ces qui ont cause de luy et de lour à jour de la confection de ces lettres pour raison cause et occasion des successions et eschoites pour testament et senz testament et en toutes autres manieres de madame Ysabel jadix reyne d'Alemaigne et de mons Hugue de Bourgoigne jadix seignour de Monreal et de damoiselle Biatrix jadix fille doudit Hugue et generalment tout le droit possession sasine proprieté et toute autre reclamacion que nous à jour de la confection de ces presentes avons poons ou devons havoir et que li dessusdiz Jehans Ysabeaux et lidiz Loys ses mariz pour raison de li et Beatrix hont povent et doivent havoir ajourduy conjunctuntement ou diviseement contre ledit duc ses freres et ses suers et ces qui hont cause de lour esdites eschoites et en chescune d'ycelles et à ycelles tant pour succession senz testament que pour testament et droit de institucion de substitucion de donacion pour cause de mort de codicelle et de toutes derrainnes ordenances et volunté que en autres manieres cause et remede de droit ou de costume quex qu'il soient que nous Hugues Jehans Ysebeaux et Loys si con dit est et Biatrix dessusdiz havons et aviens à jour de la confection de cex lettres contre lidit duc ses freres et ses suers et cex qui ont cause de luy et de lour pour raison et pour occasion desdites eschoites ou successions vehu oy et entendu diligamment le testement et la derrainne voluntey ou ordenance doudit Hugue jadix seignour de Monreal et de ladite reyne et de la tenour de ycelles lealment acertenez et generament touz le droit raison et accion que nous Hugues dessusdiz avons povons et devons havoir et que Jehans Ysabeaux et Loys ses mariz en nom que dessus diz hont povent et doivent havoir envers ledit mons le duc et contre luy ses freres ses suers et ces qui hont cause de luy et de lour pour quelque cause raison et occasion que ce soit de tout le tems passez jusques à jour de la confection de ces lettres Et pour ceste quittance nous Hudes dux dessusdiz havons doney et donons en fey et en homaige perpetuel adit mons Hugue de Chalon presenz et recevant pour luy ses hoirs et ses successours et ces qui cause auront de li le fey de Cusel de tout ce que messires Jehans jadix sires de Cusel tenoit ou devoit tenir en fey de nous Eudes dessusdiz et tout le droit raison et action real personel mixte et toute reclamacion que nous dux dessusdiz haviens poviens ou deviens havoir de droit ou de costume à Cuseal ou chestel ou bourt et en la vile et es appartenances et ou distrit et juridicion de Cusel dedenz et deffuer et touz le droit que nous aviens à demander havoir et recevoir et recovrer yces lieux en yceux et à yceux et toute possession sasine proprieté fiés et rierefiés homaiges servitutes demeneures mere mixte [em]pere juridiction et simple cohercion et toute autre chose corporel et incorporel que nous aviens de droit ou de costume et en toute autre maniere raison ou cause esdiz leus et à yceux et à un chescun de ces tant pour fourfoiture commicion de droit de juge et de fait quan pour sentence donée et à doner faite et à faire pour injures et felonies et ingratitudes contumelles culpes et negligences et touz procex fait et à faire par confessions et obligacions et pour toute autre cause quel qu'elle soit nommée Et des droiz et actions que nous avons à Cuseal et es appartenances d'yces lieus nous en façons adit Hugue de Chalon plaine et pure cession senz riens retenir à nous fuers que le fié le servise dou fié l'obeisance et la soveleneté le resors dehu et dehues pour raison doudit fié selon ce que lidiz fié l'aporte et l'omaige de cestes choses et touz les droit que puent ensuegre et despendre dou fié servise dou fey obbeissance soveleneté et resort et homaige dessusdiz et en la maniere dessusdite desquex lidiz Hugues de Chalon sui hoirs et sui successours tiendront et devront tenir en fié et en homaige pour luy et pour ses hoirs et successours seigneurs d'Allay qui seront per le temps de nous Eudes dux de Bourgoigne dessusdiz noz hoirs et noz successours qui per le temps serons ou seront duc de Bourgoigne Et sera touzjours lidiz fié de Cuseal à seigneur d'Allay quiconques sera seigneur d'Allay par le temps à venir et le tendra de nous dux de Bourgoigne et de celuy qui par le temps sera duc de Bourgoigne Et nous Hugues de Chalon dessusdiz avons recehu les choses dessusdites en la maniere dessusdite Et est accordé entre nous Heude duc de Bourgoigne et nous Hugue de Chalon dessusdit que nous Hugues de Chalon dessusdiz à nostre seue de laquelle nous et noz hoirs devons estre creuz par nostre leauté ne nous ne noz hoirs ne noz successours ne povons ne porront devons ne devront recepter ne soffrir à recepter à nostre seue ne à nostre povoir dedenz Cusel ne dors Cuseal persone quel qu'elle soit pour autruy fait ne pour atruy guerre pour faire guerre à mons Heduart de Savoye et à madame Blanche sa fame ne es hoirs de ladite Blanche ne en ce faire barat fraude ne cautele à nostre leal pooir se n'estoit toutevoie le propre fait guerre ou besoigne de nous duc de Bourgoigne ou de noz successours duc de Bourgoigne ou d'autre nostre home ou d'autre nostre justisable de nostre volonté senz toute fraude et senz touz barat ou de nous seigneur d'Allay dessusdit noz hoirs et noz successours seigneurs d'Allay et se n'estoit ensi pour noz propres homes et ensi pour noz justisables senz toute fraude tant come il voudroient faire et prendre droit par nous se nous et nostres hoirs seigneurs d'Allay et nozdiz homes et ensi noz justisables aviens à faire que jà ne soit contre ledit mons Hadouar madame Blanche sa fame ou ses hoirs senz fraude et senz mavaise cautele et en ces caus porrons nous Hugues dessusdiz noz hoirs et noz successours seigneurs d'Allay et noz homes et noz justisables faire de Cuseal et en Cuseal noz plasir come en nostre propre fey et en nostre propre domainne si ansi estoit que nous aquerissiens le domaine tant en receptant que en guerre que en autre maniere Et ce que nous Hugues de Chalon sires d'Allay dessusdiz ou noz hoirs seigneurs d'Allay acquerrons ou acquerront dedenz Cuseal et en la juridicion et district de Cusel et dedenz le mandement de Cuseaul et des appartenances que toutevoie ne seront d'autre fié sera dou fié doudit monseigneur le duc de ses hoirs et de ses successours aveque les choses dessusdites en la maniere dessusdite Et avons nous Hugues sires d'Allay dessusdiz fait fié et homaige adit monseigneur le duc de Vyeteaul et des appartenances item dou fié de Mirebel en montaigne près de Mugnet en la dyocese de Besençon et dou fié de Cusel dessusdit en la dyocese de Lyon Et nous Eudes dux de Bourgoigne [] En tesmoignaige de laquel chose nous Eudes dux de Bourgoigne et Hugues dessusdiz havons mis noz grant seaux pendant en ces presentes lettres faites et donées à Dyjon le mardi après la purificacion Nostre Dame l'an mil CCC et seze