Charter Document - 02220606

Nous officiaux de la court de Besençon faisons savoir à touz que personalement estaubliz et por ce especialement venant en droit par devant nostre comandement religiouses dames et honestes dame Julianne de Cleresvaux abbesse de Chestel Challon et tout li covent de cel meisme leu d'une part et nobles bers et saiges messires Jehan de Chalon sire d'Allay d'autre part ont fait entre lour cest acort et ceste ordinacion que s'ensuet c'est à savoir que come li bois qui est apelez vulgament Trosenz assis ou terretoire de Blaterens et de Lerna li treffonz et li terre qui est dedenz le bois dit et les apendises d'yceluy fut communaux esdites religiouses et adit Jehan de Chalon par compaignie et par covenances faites çay en arriers entre lour par lesquies lidiz messires Jehans devoit conquerir trois saziemes parties doudit bois non devisés lesqueles messires Jehans de Lons chevaliers Champirons de Monmoret et Perrenin de Lerna avoient oudit bois çay en arriers en treffont et es appendises d'iceluy lesquies trois seziemes parties lidiz Jehans de Chalon a conquis ensi come il le dit des hoirs doudit mons Jehan de Lons de Chapiron de Monmoret et doudit Perrenin de Lerna lidiz bois touz dou communal consentement desdites religiouses et doudit baron est partiz et devisez par le travers doudit bois par ensi come li fossés et les boines y sunt mises envers la mart de Forest entre doues tronches en tel maniere que dois ces fossez et ces boines en amont ensamble le traffont et la terre doudit bois et des appendises d'iceluy demore pasiblement adit baron