Charter Document - 02220605

Nous Jehans de Chalon sires d'Allay et je Guillaumes fiz çay en arriers mons Amey signour d'Arguel faisons savoir à touz que nous en regardant pas et amour à touzjours entre nous avons fait et acordé ces covenances entre nous c'est à savoir que nous volons outroions et acordons pour nous et pour noz hoirs que li uns ne li autres de nous ne puisse retenir par auvouement ne par comandise les homes à l'autre ne des homes de noz fiez ne d'autre condicion et que li uns de nous ne puisse acroi[t]re ne conquerir sus l'autre se n'estoit par l'exprès consentement de celuy sus cui li uns de nous se voudroit acroitre Et nous lidiz Jehans ne povons ne devons faire four en la ville de Buires ne ne poons ne ne devons faire molin en la reviere de Douz Et je lidiz Guillaumes ne puis faire ne doy molin es biez d'Arguel mais demore li molins des Biez adit mons Jehan et adit Guillaume li molins de la reviere de Douz en pais deçay et delay par ensi come il les tienent à temps de la confection de ces lettres Et devons nous lidiz Jehans et Guillaumes acorder les vendenges par le commun acort de trois seignours d'Arguel ou de ces qui demoreroient à leu en non de lour et partir les emendes des vendenges en tiers par ensi come l'on a fait ou temps passez Encour volons nous lidiz Jehans que lidiz Willaumes demoroit vestiz et sasiz en pais senz jemais riens reclamer en toutes les choses que il est tenanz il et sui homes à temps que ces lettres furent faites Et je lidiz Guillaumes vuil et outroy que lidiz messires Jehans de Chalon demoroit il et sui homes vestiz et saisiz de toutes les choses que il tiegnent à tens de la confection de ces lettres Et nous lidiz Jehans ne volons que nule novelerie soit faite es viles où nous partons ensamble adit Guillaumes ne à ses homes Encour cognoissons nous lidiz Jehans et Guillaumes que chescuns de nous ait la justice grant et petite sus ses honmes et cil qui tient la maison dou moiten ay ausi l'emende et la justice sus ses homes Et doivent metre li trois seignours d'Arguel les gardes es vignes c'est à savoir chescun la soue Et est à savoir que se eusi estoit que nous lidiz Jehans vousissons faire pont en la reviere dou Doub desouz Arguel que nous ne y poons faire ne à lever nul paaige Et ce prometons nous par nostre foy adit Guillaume et es suens pour nous et pour noz hoirs et se nous ledit pont facions en la reviere adit Guillaume nous en prometons à doner adit Guillaume loial eschange à regart de bones genz tout avant de ce que lidiz pont y fut fait Item encor est à savoir que se lidiz messires Jehans achete ou conquiert acunes vignes de ces de Besençon que soient ou siesent desouz ledit Guillaume que il les puet acheter et conquerir parmi le loux et le droit paiant qu'eles doivent adit Guillaume et lidiz Guillaumes puet et doit assiment acheter les vignes qui sunt desouz ledit monseignour Jehan par teles covenances come lidiz Jehans feroit les vignes qui sunt desouz ledit Guillaume Et toutes ces choses par ensi come eles sunt dessus dites et devisées nous lidiz Jehanz et Guillaumes avons promis et encor prometons pour nous et pour noz hoirs et par noz soirement fait et doné corporelment sus sains evangiles pour ce corporelment touchiés tenir et garder fermement à touzjours mais senz venir encontre par nous ne par autruy tasiblement ne en apert En tesmoignaige de laquel chose nous avons prié et requis honorable persone et saige l'official de la court de Besençon que il mete le seal de ladite court en ces presentes lettres Ce fut fait le sambadi devant Pasques flories l'an mil CCC et siex ou mois de mars