Charter Document - 02220604

Nos frater Guillermus dictus abbas de Balerna totusque conventus ejusdem loci Cisterciensis ordinis Bisuntine dyocesis notum facimus universis presentes litteras inspecturis quod nos inspecta utilitate nostra et ecclesie nostre predicte deliberatoque consilio cum religiosis viris et reverendis patribus nostris in Christo abbatibus Cistercii et Clarevallis associavimus et associamus nobilem virum dominum Johannem de Cabilone militem dominum de Allato et heredes suos im perpetuum in villis hominibus terris pratis bonis nostris et juribus universis inferius annotatis et damus et concedimus eidem et suis im perpetuum ratione associacionis predicte medietatem omnium bonorum predictorum et jurium in modo et forma inferius annotatis videlicet de valle de Hynz de Byoloi de Fyongex de Nellay de Essaflout de Songyson de Olla de Monestru de Chevrotaine de Rorteor et de possessionibus universis hominibus et rebus quibuscumque quos et quas habemus et possidemus et habere debemus in villa de Doucey et ejusdem territorio in villa de Chambly et ejusdem territorio et in villa et territorio de Monte supra Mugnet Item eundem Johannem et suos im perpetuum associavimus et associamus in omnibus possessionibus et juribus aquis et nemoribus aquarum decursibus quocumque jure ad dictam ecclesiam de Balerna spectantibus sitis versus Grandem Vallem et versus Bonum Locum et versus Crilliacum retinentes nobis et ecclesie nostre predicte in perpetuum in omnibus locis predictis habitatis et habitandis et eorum territoriis nemoribus et finagiis grossas decimas et minutas et jura patronatuum et presentationes incurandorum que decime percipi debent in campis prout consuevimus Item retinuimus et retinemus nobis et ecclesie nostre predicte im perpetuum grangiam nostram de Rorteour et territorium dicte grangie per metas ab ipso et nobis concorditer positas videlicet per duos magnos lapides desuper combam Villici abhinc in transverso per le goleyron de Cheneviere et per altum versus terram de Mugnet usque ad terram de Mugnet in cujus grangie territorio nullus de cetero de habitantibus presentibus et futuris in locis predicte associacionis usagium habeat pasturandi vel terras infra metas dicte grangie positas excolendi Item retinuimus et retinemus modo quo supra in loco qui dicitur Marche prata ad viginti carratas feni et casale trium jornalium terre ad domum seu grangiam cum orto et utilitatibus sicut nobis placuerit faciendam Item retinuimus et retinemus modo quo supra grangiam et domum lapideam nostras sitas in valle de Hynz cum orto et circonferencia dictarum domus et grangie et viginti jornalibus terre cum prato de Majori Brolio prout in dicto loco mete sunt posite ab ipso Johanne et nobis concorditer et etiam casale grangiarum nostrarum ad tria jugera en Essaflot et jus et usagium depascendi pro bestiis et pecoribus nostris in omnibus locis associacionis predicte in locis communibus pasturandi Item retinuimus et retinemus ut supra jus et usagium in omnibus nemoribus dicte associacionis pro necessariis nostris ecclesie cellariorum domorum et grangiarum nostrarum et omnibus aliis faciendis In omnibus autem aliis locis et singulis dicte associacionis habitatis et habitandis villis terris nemoribus pratis aquis et omnibus aliis dictus dominus Johannes et heredes sui debent percipere et habere medietatem omnium reddituum proventuum exituum censuum tailliarum serviciorum emendarum molendinorum furnorum batatoriorum et aliorum edificiorum pedagiorum conductuum ventarum justiciarum et executionum justiciarum manusmortue caducorum et omnium aliorum et singulorum proventuum et obvencionum nunc existentium et proventurorum in futuris et nos dicti abbas et conventus aliam medietatem in omnibus et singulis supra dictis Concessimus autem nos dicti abbas et conventus eidem Johanni quod ipse in locis predicte associacionis unam tantum domum fortem edificare possit si sibi et ecclesie nostre videbitur expedire in qua domo forti abbas Balerne cum uno fratre vel cellerarius abbate absente pro necessitatibus nostris liberum ingressum habeamus Et dictus Johannes et castellanus suus dicti loci in domo quam nos dicti abbas et conventus habebimus prope domum fortem suam habeant libere illud idem juxta quam domum fortem nos dicti abbas et conventus locum congruum et specialem ad domum edificandam pro nobis et ecclesia nostra habeamus et habere debeamus competentem Pro qua domo forti et medietate predicta locorum predicte associacionis dictus Johannes et sui tenentur per se vel per certos nuncios suos jam dicte ecclesie nostre de Balerna solvere singulis annis im perpetuum in festo beati Martini hyemalis super majus altare ejusdem monasterii quinque solidos censuales usualis monete currentis in civitate et dyocesi Bisuntina Aliam vero domum fortem dictus Johannes vel sui non possunt nec debent edificare alicubi in locis predicte associacionis nisi de consensu expresso abbatis ecclesie supra dicte Nec dictus Johannes vel sui nec nos vel successores nostri personas habitantes in locis predicte associacionis vel eorum res possumus nec debemus im perpetuum mittere vel ducere in aliquem exercitum vel calvacatam absque consensu abbatis qui in Balerna pro tempore fuerit et consensu dicti Johannis nisi pro defensione et utilitate predictorum locorum et ecclesie et locorum de Balerna et pro defensione terre proprie dicti Johannis et hoc fieri debet de consensu et mandato communis prepositi nostri qui ad hoc faciendum tenetur et cui nos dicti abbas et conventus et dictus Johannes plenam super hoc conferimus potestatem Item dictus Johannes vel sui non possunt nec debent res associacionis predicte ab aliquo in feodum accipere nec extra manum suam ponere nec inter heredes dividere sed primus et principalis de heredibus suis successive sine divisione aliqua aliis coheredibus suis facienda dictam associacionem suam teneat et habeat in forma superius et inferius annotata qui dicti heredes successive infra annum ingressus sui ad istam associacionem tenentur presentem litteram renovare nobis et ecclesie nostre de Balerna sub hiis tenore et sigillis et nos eisdem heredibus tenemur facere illud idem Insuper dictus Johannes et sui tenentur im perpetuum omnia et singula predicta associacionis predicte cum propriis suis sumptibus defendere et ecclesie nostre de Balerna et membris ejusdem dare consilium et juvamen quocienscumque super hoc fuerint requisiti cum consilio et auxilio habitantium in locis associacionis premisse Item sciendum est quod ad regendum loca predicte associacionis debet constitui aliquis fidelis prepositus a nobis dicto abbate de Balerna et successoribus nostris et dicto Johanne et suis in hoc successoribus vel certo mandato utriusque Et si nos vel successores nostri et dictus Johannes vel ejus successores in constitucione dicti prepositi discordes quod absit fuerimus cellerarius Balerne et castellanus loci una cum consilio quatuor burgensium dicti loci quos ad hoc faciendum secum evocent ipsum instituant qui si forte in unum non convenerint majoris partis super hoc stabitur arbitrio et etiam voluntati Qui prepositus sic constitutus per juramentum suum recipiat et congreget fideliter omnes redditus exitus proventus et servicia locorum associacionis predicte et coram nobis dicto abbate de Balerna et successoribus nostris et dicto Johanne et suis successoribus vel communi mandato nostro super premissis computet et respondeat fideliter quocienscumque fuerit requisitus Castellanus vero [dicti] Johannis qui in dicta domo forti dicti domini Johannis pro tempore preerit de receptione reddituum dictorum locorum se nullatenus intromittat sed dictam domum fortem custodiat et terram tantummodo manuteneat et defendat nec alicui de habitantibus in locis dicte associacionis dictus castellanus consilium det in causis existentibus inter ipsos habitatores coram preposito vel baillivo nec ab aliquo habitante in dictis locis dictus castellanus nec prepositus similiter servicium recipiant ultra summam duodecim denariorum semel in anno et hoc firment in creacione sua dicti castellanus et prepositus proprio juramento Nec nos dictus abbas vel nostri nec dictus Johannes vel sui nec baillivus ejus nec aliquis de nunciis suis excepto communi preposito assisias de habitantibus in locis dicte associacionis et rebus et causis eorum in dicta terra teneat nec habitantes in locis dicte associacionis extra ipsam terram indebite ad judicium evocet vel evocari faciat vel permittat nisi presente nobis videlicet abbate de Balerna et dicto Johanne aut utriusque nuncio speciali Item dictus Johannes et sui im perpetuum non possunt in terra dicte associacionis sibi aliquid speciale acquirere vel habere nec eciam nos abbas et conventus predicti Si quis autem de habitantibus in dictis locis tam presentibus quam futuris nobis vel nostris aut dicto Johanni vel suis aliquid conferre voluerit totum debet esse commune nobis et dicto Johanni excepto si aliquis velit aliquod mobile in puram elemosinam ecclesie nostre supra dicte dare vel nobis et dicto Johanni aliqua hencennia seu munuscula usque ad valorem quinque solidorum semel in anno in cibariis et non pecunialiter conferre spontanea voluntate Omnia autem alia servicia undecunque proveniant ab habitantibus in dictis locis seu ratione dictorum locorum tam nobis et nostris quam dicto Johanni et suis sine fraude aliqua per medium dividantur Si vero dictus Johannes vel sui et nos dicti abbas et conventus vel nostri infra loca hujus associacionis et in locis ipsi associacioni successive attingentibus aliquid modo quolibet acquisierimus a quocumque vel edificaverimus vel refecerimus debemus quilibet nostrum medietatem precii solvere et acquisita modo associacionis predicte im perpetuum communiter possidere Item prepositus ille qui a nobis et dicto Johanne vel utriusque mandato ut dictum est constituetur ad recipiendum redditus et proventus dicte terre et premissa omnia facienda omni anno die circumcisionis Domini in presencia abbatis de Balerna qui pro tempore fuerit et dicti Johannis et suorum vel cellerarii Balerne et castellani dicti loci vel utriusque nostrum nuncii tenetur modum hujus associacionis legere et repetere in communi habitantium et ad hoc eos convocare et jurare ipse et castellanus premissa omnia fideliter observare Hec autem omnia [] In quorum omnium testimonium nos dicti abbas et conventus de Balerna sigilla reverendorum patrum nostrorum in Christo de Cistercio et de Claravalle abbatum de quorum voluntate et consilio predicta associacio facta est una cum sigillo nostro dicti abbatis de Balerna presentibus litteris rogavimus et fecimus apponi Nos vero frater Theobardus de Cistercio et Gerardus de Claravalle dicti abbates et qui predictis omnibus et singulis consensum prebuimus [et]assensum sigilla nostra una cum sigillo dicti abbatis de Balerna presentibus litteris apposuimus in testimonium omnium et singulorum premissorum Datum anno incarnacionis Dominice MCC octuagesimo quinto mense septembri