Charter Document - 02220603

Nous freres Henry priour de Bonleu de l'ordre de Chertrosse en la dyocese de Besençon et tout li covent de cel meisme leu et nous Jehans de Chalon sires de Allay faisons savoir à touz que nous regardé et considerez les profit de nous devantdit priour et covent de nostre prioré et de noz homes et de noz terres et por ce meismement que nous puissons muez estre governé et deffendu et regardé ausi le profit de nous devantdiz Jehan de Chalon signour d'Allay et de noz hoirs et meismement pour ce que desir avons d'emender ledit prioré de Bonleu avons fait entre nous les covenances et la compaignie qui s'ensuegnent ci après c'est à savoir que nous li devantdiz priour et covent de la volonté et dou consentement de nostre chapitre generaut et pour nostre très grant profiz avons acompaigney et acompaignons pour nous et pour noz successours ledit mons Jehan de Chalon signour d'Allay pour luy et pour ses hoirs à touzjoursmais à toutes nostres viles homes terres prez jouz et autres bois aigues descours d'aigues et en toutes autres choses coment que eles puissent estre nommées et apelées lesqueles nous avons poons et devons avoir es lues que sunt dedenz les terres cy après devisez et li avons acompaignié pour la moitié laquele moitié de toutes les choses lidiz Jehans et sui hoir doivent panre et avoir à touzjoursmais et nous l'autre moitié c'est à savoir dois l'areste dou mont de Saint Morix tanque à la fontaine qui saut dou pré de la Valliere et dois celle fontaine dou pré de la Valere par ansi come li ruisseaux de celle fontaine s'estent tanque à forneal de La Chauz de Dombiez et dois le forneal tanque à plus haut de l'areste de la coste qui est entre ledit forneal et le laveteal de La Chauz de Dombiez par ensi come li haut de l'areste de la coste se comence endroit dou forneal par ensi come li haut de l'areste de la coste se porte par la chauz Valier et s'estent tanque à Lyme et dois enqui per ensi come li Lime se porte tanque à Dombiez et dois le Dombiez à travers tanque à l'areste de la montaigne qui est sus le laic de Marchuet par endroit dou Lime par ensi come li plus haut de l'areste de celle montaigne se porte tanque à golet et dois le golet ensi come l'aigue se porte vers le Saut Girart et dois le Saut Girart ensi come li aigue se porte tanque sus la roche dou vaul de Chambly par ensi come ladite roche s'estent tanque endroit des doues pierres qui partent la terre des Grant Chietes et de Saint Clo Et generament avons acompaigney ledit mons Jehan de Chalon pour luy et pour ses hoirs à touzjours mais pour la moitié en touz les jours touz autres bois lais aigues descours d'aigues et en toutes autres choses que nous avons poons et devons avoir dois Doucey envers les Jouz en quelque leu que ce soit et à cui que nous l'aions à partir saul que tanque nous retenons à nous pour la maison de Bonleu le bois et les places ensi come aigue se porte tout le pendant des costes dois le plus haut de Mangoneal et de Chave Roche tanque à laic de Bonleu et d'autre part dois le plus haut de Griblet tout le contre val tanque à la chacié qui est dessus la maisons es convers ensamble tout le laic et l'estant de Bonleu que nous retenons à nous et à la maison de Bonleu sen partie doudit mons Jehan ne d'autruy Et est encores à savoir que ensi est acordé entre nous les devantdiz covent et prieur de Bonleu et nous Jehans de Chalon seignour d'Allay que tuit li molins et les rivieres et les homes et les terres plaines qui sunt dois le Saut Girart et dois la coste de Bonleu ensi come li coste s'estent vers le mont Saint Morix en aval vers Doucey et vers Husselle demourent quites à la maison de Bonleu senz partie de nous Jehans devantdiz ne de noz hoirs saul que tantque les sarres qui faites y sunt ou que l'on y porra faire ou fera ou tens à venir et tuit li bois qui sunt dedenz ces termes qui tiegnent plus de I jornal de terre delez le Paint sunt communaux par moitié à nous priour et covent de Bonleu et Jehan dessusdit excepté le bois que nous de Bonleu avons retenuz devant pour raison de Bonleu et sau ce que nous devantdiz priour et covent et nostre successours poons et devons panre bois par touz les bois commons lay où miex nous plera pour la necessité de nous et de nostre maison quelque part que nos les aions senz estre pris à aichoson soulement que nous ne les vendons Et en toutes ces choses que communes nous sunt ou es edifices que fait y saront nous li devantdiz priour et covent ou nostre successours et nous Jehans de Chalon dessusdit et nostre hoirs par comuns acort devons metre officieurs et partir par my entre nous en bone foy toutes les valours et les yssues qui en istront soit en censes tailles taiches emendes grant et petites corvées exactions quels qu'eles soient en toises aminaiges ventes et en toutes autres valours coment qu'elles puissent estre nommées et appellées soit en bois ou en plains en viles pleines ou en viles franches se faite y estoit en laquele vile franche se faite y estoit ou elle se façoit nous li devantdiz priour et covent de Bonleu ou nostre successours poons faire franchement senz nul contredit dou devantdit mons Jehan ne de ses hoirs une maison pour atraire noz biens senz paier nul servitut Et poons ausi avoir faire ou refaire à plain de La Chaux de Dombiez une soule grange pour metre noz diesmes et noz choses et lidiz messires Jehans de Chalon ou sui hoirs per comun acort de nous et de luy lay où miex li plera en la terre de la compaignie puet faire une maison fort à ses propres missions senz contredit de nous laquelle doit estre soue propre senz la compaignie et il la doit garder à ses despens à laquele maison toutevoie se acunes rentes y avoit elles doivent estre communes par my à nous et à luy Et est encores à savoir que les donacions des yglises li patronaiges et li diesmes des devantdiz leus de la compaignie et de toute la terre de Bonleu demorent quittes à nous priour et covent de Bonleu et à noz successours senz partie dou devantdit mons Jehan de Chalon ne de ses hoirs Et doivent prendre nostre gaigneour de Bonleu bois en touz les bois de la compaignie quelque part que ce soit pour lour necessités faire saul que vendre et doner se ce n'estoit en leu deffendu per comun acort de nous et doudit mons Jehan Et nous lidiz Jehans de Chalon sires d'Allay en recompensacion de la compaignie et de la communaté dessusdites faites à nous doudit priour et covent de Bonleu avons doné donons et outroions à touzjoursmais pour nous et pour noz hoirs par donacion faite entre les vis adit priour et covent de Bonleu et à lour successours cinquante livres de monée coursable en l'arceveschié de Besençon c'est à savoir tel monoie come il corra pour le temps lesquies cinquante livres nous volons que il les preignent chescun anz une fois à touzjoursmais à la feste de saint Andreu l'apostre sus nostre rente que nous avons ou puis et en la salnerie de Salins dou bourt comunal es hoir nostre pere le conte de Chalon Et volons et comandons par ces lettres à ces qui tiegnent et tanront et recevront nostre rente de ladite salnerie que il dois ores en avant paoient bailloient et delivroient à celuy qui priour de Bonleu sera ou à covent ou à lour comandement lesdites cinquante livres touz les anz une foiz à terme dessusdit à touzjoursmais senz plus atendre autre comandement de nous ou de noz hoirs Et si ansi estoit que par aventure ladite salnerie et puis deffaillit ou fut troblez par guerre par tribulacion ou per acum o[r]vale per que lidiz paiement ne se poit faire à ces de Bonleu et à lour successours pour nous et pour noz hoirs se cil deffaut avenoit que nous lour paierons ou farons paier chescun an au terme dessusdit lesdites L livres sur les rentes que nous avons es choses de la compaignie qui est entre nous et lour tout ansi come il les deussent panre en ladite salnerie Et lour prometons que nous lour privileges et lour lettres qu'il hont dou conte de Vianne des seigneurs de Clerevaux et des seigneurs de Crilley touz lour homes et toutes lour autres choses quelque part que il les aient entour nostre signorie a doues lees prés et toutes les choses contenues dedenz les termes de la compaignie lour garderons et aiderons à deffendre en leatel et à nostre pooir à nostres propres missions sau que tant se nous faisons missions pour lour homes deffendre en acun caux lidiz lour homes c'est à entendre cil pour cui nous farons la mission sunt tenuz de nous restorer la mission à la taxacion d'un proudome avez le priour ou le celerier de la maison de Bonleu liquel proudome nous ou nostre comandement devons metre avez ou le celerier et telx qu'il soit digne de foy pour ordener de nostre mission Et lour avons encor doné et donons outroié et outroions que il es quatre festes anual de l'année chescun an à touzjourmais un jour et une nuit pour chescune feste chescun an puissent pachier ou faire peschier à un filé souz senz autre filez ou à une sainne soule senz autre sainne et senz autres filez en noz lays de Chambly pour faire pitance à covent de Bonleu Et encor ensamble ce nous lour prometons faire oster et despartir touz les chemins et sentiers qui sunt dois le Bolet tanque sus l'ayeteal de Forcom par dessus les roches qui sunt sus Bonleu Et ces choses dessusdites [] Et à plus grant fermeté de ces covenances fermement tenir atendre et acomplir adit mons Jehan de Chalon et à ses hoirs nous li devantdiz priour et covent [avons prié et requis] religiouses persones et honestes frere Hugue priour de Valcluse de l'ordre de Chertrosse de la dyocese de Besençon que mete son seal en ces lettres en tesmoignaige de verté ensamble le nostre seal de Bonleu [] Et s'ensi estoit que nous ou nostre hoirs deffaillissiens de tenir toutes les covenances ensi com dessus les avons promises ou acunes de lour nous lidiz Jehans volons et outroions que honorable persone et discrete li officials de la court de Besençon qui à celuy temps saroit que quarante jours passez après ce que li priours et li covent de Bonleu nous auroient requis de bouche ou noz hoirs par lour lettres seelées de lour seaux pendant de radracier et emender l'entreprise que faite auriens et nous ne l'auriens fait deenz la quarantaine nous puisse dois donques en avant excommunier nous et noz hoirs senz autre monicion faire come de chose ajugié metre nostre terre en entredit mais que il soit toutevoie enformé premier de nostre deffaut selon les covenances dessus escriptes par doux tesmoins dignes de foy à la juridicion douquel official nous nous sumes submis nous et nos hoirs et li avons supplié et requis qu'il mete le seal de la cour de Besençon en ces presentes lettres ensamble le nostre seal lequel nous avons mis en ces lettres en tesmoing de verté [] Faites et donées l'an Nostre Seignour corrant per mil CCC et quatre ou mois d'avril