Charter Document - 02220600

Nous Jehans cuens de Bourgoigne et sires de Salins faisons savoir à touz que nous estaublissons une chapele en honour de Deu et de Nostre Dame et de sainte Katheline en nostre donjon de Monmaour en laquel chapele nous ordenons et estaublissons que uns prestes soit perpetuelment qui serve à Diu et à Nostre Dame et à sainte Katheline en ladite chapele pour le remede de nostre arme et de noz fames de noz peres et de noz meres et de noz ancessours Et donons et assignons à prevoire qui à ladite chapele servira dix livres de rente d'estevenens à avoir et recevoir chescun anz permaignablement en nostre cense de Salins à la saint Andreu Et pour ceste chose tenir fermement enloions nous et noz hoirs et nous submetons à la juridicion l'arcevesque de Besençon qui nous et noz hoirs puet escommunier si nous ou nostre hoir dou devantdiz estaublissement que fait avons resaillons Et retenons à nos et à noz hoirs qui tanront le devantdiz chestel le don de la chapelenie de ladite chapele toutes les foiz que ele vaquera En tesmoing de ce nous avons mis nostre seal pendant en ces lettres Ce fut fait le juedi après feste saint Pierre et saint Poul l'an de l'incarnacion Nostre [Signour] qui corroit par MCC et sexante