Charter Document - 02220599

Nous Jehans de Chalon sires d'Allay et nous freres Poinz abbes dou Mont Sainte Marie et li covent de cel meisme leu de l'ordre de Cyteaux de la dyocese de Besençon faisons savoir à touz que con discort fut mehuz entre nous ledit Jehan d'une part et nous lesdiz religious d'autre part sus ce que nous lidiz Jehans demandiens et quereliens esdiz religious qu'il estoient trop entrez en noz bois et amortez noz bois environ ladite abbaie et d'environ lour granges de Seçays et de Montorge à la parfin par consoil de proudomes pais et acourt est choiz entre nous ledit Jehan et nous lidiz religious en la maniere que s'ensuit c'est à savoir que nous lidiz Jehans pour nous et pour noz hoirs et pour noz successours et pour ces qui cause porroient avoir de nous en quelque maniere que ce fust ladite accion demandes et quereles avons quitté et quittons esdiz religious et touz les privileges et les lettres que lidiz religious ont de noz devanciers c'est à savoir de bone memoire mons Gauchier signour de Salins de nostre pere le conte Jehan conte de Bourgoigne et signour de Salins et de nostre frere le conte Hugon approvons ratifions et confermons à touzjoursmais esdiz religious et à ladite abbaie ensamble touz lour tenement d'entour ladite abbaie lour viles de L'Abergement et de Roumoray et les tenement desdites viles lour granges d'entour l'abbaie de Seçays et de Montorge et les apartenances d'yceles en toute liberté sauz ce que nous lidiz Jehans retenons à nous esdiz leus l'omicide pour pugnir l'omicide nous entendons celuy qui doit sofrir mort de cors et li maires de l'iglise le doit jugier et le nous doit rendre en chemise et se lerres ou mordriers estranges qui deut soffrir mort de cors estoit pris en la terre desdiz religious nous devons avoir le cors et l'avoir Et declarons par ces presentes lettres les limitacions de ladite abbaie et desdites granges et sunt et durent li termes de l'abbaie par les termes cy après devisés c'est à savoir dois la fontaine dou Morchin par le plus aut dou mont dessus ladite fontaine tanque à la voie dou mont Rayençant et par le commun qui est entre lesdiz religious et ces dou Laic par enson le Champ Novel en alant par l'embotour vers la fontaine de la Petite Combe et par enson la Grant Combe en passant le Doub vers la partie de Joigne par le trahait dès là près tanque es boines mises par lour et par ces dou Laic entre le bois et la grange de Belmont et dois lesdites boines par ensi com li tenement dou Rougebier et dou Fourcostier partent es terres de Belmont et de L'Abergement tanque par le plus aut de la Longe Chenaut par devers le Fourcostier en trahant aval le droit tanque à Doub Et par d'autre part dou Doub sunt mises bones par les rochaz qui sunt dessus dou Verbon par ansi con li plains à ces de L'Abergement durent tanque à la coste dou mont de la Croiz et par le saut dou Loanz tanque es boines mises par dessus la coste qui est sus le pré Dan Climent par ansi con li tenement à ces de Romoray s'emporte tanque es boines mises par adessouz dou Chesteler tanque à la bone mise outre le Chesteler en la coste dou Boujon tout le pendant de la coste ensi come aigue pent vers les terres de Romoray par les bones mises tanque à mont des Billes par ensi con lidiz religicus ont desboigney entre lour et ces de Romain Mostier sauz ce que nous lidiz Jehans pour nous et pour noz hoirs retenons à nous la signorie et la proprieté dois ledit mont des Billes envers la coste qui est dessoz l'abbaie lequex s'encomence à l'estant ensi con li une coste pent vers l'autre et li remanant de ladite coste devers l'abbaie demoure esdiz religious tanque à la vile de Romoray ansi come aigue pent devers Saint solaz levant vers l'abbaie et vers la vacherie et vers Romoray en proprieté et pour faire lour volonté en tel maniere que nous lidiz Jehans ne li nostres ne poons oudit leu ouquel nous retenons la signorie ediffier ne maisoner ne habergier ne doner autruy ne à noz homes presenz et à venir puissance de usagier en bois ne en pasquiers ains devons garder le bois doudit leu pour nous et pour lour et y poons panre dou bois à nostre volonté et li plains qui sunt entre lesdites doues costes demorent esdiz religious paisiblement pour faire lour plaine volonté senz essarter ne doner atruy le bois Item li termes de Seçay sunt et durent par la culée de Graingechanz par les boines mises tanque es auges à Bonhomme et dois enqui par les bones mises tanque à cernay à la Gruye et par la chamelle à l'Aguillon tanque à cernoy Vuillaumier et par ensi come les terres esdiz religious touchent tout entour es terres à ces de Dompierre de Bovenens de Fraigne de Corvieres et de Boujaille tanque es Rochaçons sus Grangechanz Item li termes de Montorge sunt et durent par les terraux que mi partent les terres de Viler et de Montorge par les boines mises ason Biauregart et par reviers le bois tanque à l'oie à Vauz et par le dependant de mont Virement par devers la Jouz tanque es Fontainz par les boines mises et dois enqui tanque à cort de la voie d'Orbaine par les boines mises en revenant arriers par les boines mises par devers le Noseroy tanque à la Grete et dois enqui tout reviers le bois par les boines mises tanque à cort des devantdiz terreaux Et est encore à savoir que nos lidiz Jehans volons et outroions pour nous et pour noz hoirs et pour noz successours et pour ces qui cause porroient avoir de nos que ladite abbaie toutes les granges lour celiers et tuit lour homes et toutes les appendises de ladite abbaie aient usaiges par toute nostre terre en la maniere que estoit outroié à ladite abbaie par lour privileges qu'il ont de noz devanciers c'est à savoir en noz bois de Jouz en pasquier en aigues et en touz autres usaiges pour toutes lour necessités car nous sumes certains par les privileges de noz devanciers qu'il avoient outroié à ladite abbaie sauz le joraz de Monmaour et ce excepté que lidiz homes ne puent boschoier es bois qui sunt entre L'Abergement et Rochejan ou mont qui est apellez li mont de la Croiz tanque à Gellain et dois les boines mises tanque à Rochejan Et doivent havoir lidiz homes chemins covenables par toute nostre terre par terre et par aigues pour aler par toutes nostres autres jouz et puent pastourer et doivent nostres homes et li homes desdiz religious li uns sus les autres mais li nostres ne puent ne doivent pasturer ne usagier sur la propre demeneure et les tenement de l'abbaie ne de lour granges environ l'abbaie et la grange de Belmont Et volons et outroions que tuit li plains esdiz religious et à lour homes en quelque maniere qu'il les aient et lour granges et li bois qui sunt dedenz les plains et dedenz les bones qui sunt mises par nous et par lour lour demoroient et toutes les autres choses qu'il avoient et possidoient ou autres pour lour à temps de la confection de ces lettres en nostre signorie sauz que essarter la Jouz et sauz ce que nous lidiz religious avons laissiez et quitté adit mons Jehan de Chalon et à ses hoirs noz viles dou Rougebiez et dou Fourcostier ensamble touz lour tenement en quelque maniere que nous les y heussiens et toutes les appartetenances sau ce que li diemes et li parochaiges desdites viles nous demorent en la maniere que nous et nostre devanciers les avons receu tanque à temps que ces lettres furent faites Et est encor à savoir que nostre molins de nous devantdiz Jehan et de nous dessusdit religious fait et à faire et tuit autres engins se fait estoient ou terretoire de Fraigne par acort fait entre nous demorent communal par my et se doivent faire les missions desdiz enginz par my en tel maniere que nous lidiz Jehans et li nostres devons faire et maintenir les chauciés à noz propres missions et nous doivent li estanz les aigues li poissons et les places des estanz qui sunt et que l'on y fera senz partie desdiz religious et devons amender les domaiges des terres que li estanz occuperoient Et ne poons ne ne devons nous lidiz Jehans ne li nostres controindre noz homes de muedre à autres molins que esdiz molins communaux Et toutes les covenances dessus dites et contenues en ces lettres et les choses dessus escriptes que à ladite abbaie demorent nous lidiz Jehans pour nous et pour noz hoirs et pour noz successours et pour ces qui porroient avoir cause de nous prometons esdiz religious et à lour successours par nostre soirement doné corporelment sus sains evangiles et par solemne stipulacion garder maintenir et deffendre contre toutes genz à noz propres despens en la maniere que nous et nostre devanciers les avons gardé ou temps passez come les choses qui sunt en nostre garde Et nous li devantdiz abbes et covent recognoissons que à temps doudit mons Jehan et de ses devanciers nous et nostre abbaie avons estez gardez bien et passiblement par aux et de si lontemps que memoire ne est dou contraire et encor volons touzjours nous et nostre abbaie demorer en la garde de luy et de ses hoirs senz autre gardiain faire ne apeler Et avons requis noz reverans peres les abbés de Cyteaux et de Clerevaux que il les choses dessusdites ratiffioient et confermoient et en signe de ratificacion et tesmoignaige de verté metent lour seaux en ces lettres Et nous li devantdiz abbés de Citiaux et de Clerevaux à la requeste des devantdiz religious les choses dessusdites ratifions et confermons et avons mis noz seaux en ces presentes lettres avez le seal doudit mons Jehan et desdiz abbé et covent à plus grand surté et en tesmoing de verté Et nous li devantdiz Jehans et abbez pour nous et pour nostre covent avons mis noz seaux en ces presentes lettres en tesmoignaige de verté et avons prié et requis honorable persone l'official de la court de Besençon que il avec noz seaux et les seaux des abbez dessuzdiz mete le seal de ladite court de Besençon en ces presentes lettres Et nous lidiz officiaux de ladite court de Besençon le siege vacant à la requeste desdiz mons Jehan et doudit abbé pour luy et pour son covent avons mis le seal de ladite court en ces presentes lettres avez les seaux dessusdiz Faites et donées le londi après la feste saint Gregoire ou mois de marz l'an de l'incarnacion Nostre Signour corrant mil CCC et onze