Charter Document - 02220598

Je Girars li Mareschauz demorant à Salins fiz çay en arriers Haymonet Maire d'Oigney fais savoir à touz ces qui ces lettres verront que comme li nobles bers mes amez sires messire Jehans de Chalon sires d'Allay ait doné à moy et à mes hoirs de mon cors cenz soudées de terre à panre et à recevoir chescun anz le jour de l'uictive de la nativité Nostre Signour en sa rente dou poiz de Salins et ait ausi donné à moy et à mes hoirs de mon cors descendant un sien chasal assis en la vile de Salins ou bourt communal es hoirs le conte de Chalon devant la maison qui fut jadiz maistre Guillame de Baumes d'une part selon la maison qui fut Hugonet dou Molinet et d'autre part selon la maison qui fut Symon à Papelart en la forme et en la condiction qui est contenue en la leitre faite de ce seelée dou seal doudit mons Jehan je dis et reconois en verité que je et mi hoir de mon cors qui après moy tanront et auront les choses dessusdites les devons tenir et reconostre doudit mons Jehan de Chalon signour d'Allay et de ses hoirs car eles muevent de luy ne en main d'autre seignour je ne mi hoirs ne les poons metre ne d'autre seignour reconoistre Et pour ces choses dessusdites je et mi hoirs le doions servir de quelque mestier que nos soions En tesmoignaige de ceste chose j'ay requis et fait metre en ces leitres le seal dou chapitre de Saint Anathoile de Salins Faites et donées ou mois de mars l'an MCC nonante et un