Charter Document - 02220597

A touz [ces] qui ces presentes lettres verront Phelipes fil de roy de France contes de Poitiers et de Bourgoigne palazins et sires de Salins et Hugues de Chalon sires d'Arlay chevaliers salut Pour ce que de chescune chose qui de acourt de cuer et de bone volonté de ceus à cui elle touche se fait est et doit estre plus ferme et estauble à tozjours et que l'amour et la loialté qui sunt es cuers aperent et puissent apparoir plus clerement en temps et en leu par fait et par ouvre il avient moult de foiz ne il n'est mie contraire à raison que en moult de caus confederacions alliances et traictiez se font dou seignour à son home et feal et de l'oume et feal à seignour à ce que li uns soit et doie estre outre son deu acostumé plus fermement tenuz à l'autre es caus et es bessoignes que chescun jour puent sourdre et avenir et esquies li uns puet avoir mestier de l'autre selon ce que les choses avienent et puent avenir desqueles dusques eles aviegnent nature humaine ne puet avoir plainne cognissance Lesquex choses considerées nous faisons savoir à touz que nous de comun acort et de comun assentement avons fait traictié alliances et covenances en la maniere et selon ce qu'il est cy dessoz escript et devisé c'est à savoir que je Hugues de Chalon sires d'Allay devantdit promet loialment et à bone foy et oblige moy et toute ma terre de Bourgoigne que j'ay en l'Empire à mon très chier et très amez seignour haut home noble et puissant mons le conte dessusdit douquel je suis hons liges en la maniere que mes sires et peres cui Dex absoille l'estoit quant il ala de vie à mort de aidier et de secorre luy et à son certain comandement à grant force et à petite bien et loialment et en bone foy de toute ma terre que je ay en la conté de Bourgoigne et en l'Empire contre le duc de Bourgoigne ou caus tant soulement que il vendroit courre sus ledit mons le conte en sa terre de Bourgoigne en l'Empire et contre toutes autres persones qui puent vivre et morir de quelque digneté estaut ou condiccion que eles soient tout en deffendant ledit mons et sa terre de Bourgoigne qu'il ha en l'Empire de tout ma force et de tout mon pooir de madite terre que j'ay en l'Empire come en assaillant autruy ou autres en toutes les manieres et condiccions que je le porray faire excepté mon très chier seignour mons le roy de France et excepté l'arcevesque de Besençon et le dalphin de Viennois contre lesquex se lidit mons le conte lour movoit guerre je ne seroie ne voudroie estre par ceste alliance avecques l'un ne aveques les autres ainz me tendroie de aidier adit mons et esdiz arcevesques et dalphins et à chescun de eaux mais ou caus que lidiz arcevesques et dalphins ou li uns de eaux movroient guerre adit mons ou voudroient meffaire à luy ou à sa terre de Bourgoigne en l'Empire je seroie et vuil estre tenuz aidier adit monsignour contre lesdiz arcevesque et dalphin et chescun de eaux de tout mon pooir de ma terre de Bourgoigne que j'ay en l'Empire bien et loialment et exceptez mes chiers et amez cousins Jehan de Chalon conte d'Auçuerre et mons Beraut seignour de Mercuel desquex je ne fais ne entent à faire nules noveles alliances d'estre contre eaux ne devers eaux par ceste alliance ançois vuil estre tenuz adit mons le conte se il avoit à faire à eaux en la maniere que je estoie tenuz à luy devant la confection de ces lettres pour cause de mon fié que je tien de luy et excepté monseignour de cui je tien de fié de ce et en tant que li fié le requiert tant soulement et exceptez mes homes qui estoient homes de mon chier pere dessusdit cui Dex absoille quant il ala de vie à mort ou devoient estre de droit et qui pour raison de partaige de pere ou de mere il devroient entrer ou entreroient en nostre homaige par la coustume de Bourgoigne et exceptez ausi mes justisables lesquies homes et justisables voudroient faire et panre droit pour moy devant moy ou devant mon comandement Et nous contes de Poitiers devantdit regardant l'affection et la loialté que lidiz messires Hugues de Chalon monstre luy avoir envers nous et pour ce que quant plus verra l'amour et la liberalité que nous li monstrons et volons monstrer par effet tant plus y soit entalanté de nous miex servir et aidier volons et à ce obligons nous et nostredit conté et nostre terre de Bourgoigne que nous avons en l'Empire aidier et secorre à grant force et à petite bien et loialment de tout nostredit conté et terre de Bourgoigne en l'Empire adit mons Hugue de Chalon et à son certain comandement contre le duc de Bourgoigne ou caus tant soulement que il voudroit courre sus ledit mons Hugue en la terre de Bourgoigne qu'il tient de nous en fié en l'Empire et generament contre toutes autres persones qui puent vivre et morir de quelque digneté estat ou condiccion qu'eles soient tant en deffendant ledit mons Hugue et sa terre qu'il a en l'Empire come en assaillant atruy ou autres en toutes les manieres ou condiccions que nous le porrons faire de nostre conté et terre de Bourgoigne en l'Empire excepté mons le roy de France et le roy d'Alemaigne le conte de Monbeliart et mons Hugue de Bourgoigne esquies contes de Monbeliart et mons Hugue de Bourgoigne par ces presentes alliances ne faisons ne entendons à faire acunes noveles alliances ne ne volons que par ces aliances ne par chose qui soit contenue en ycelles nul novel droit lour soit ne doie estre aquit contre ledit mons Hugue de Chalon que nous ne soions tenuz à luy par raison de ce qu'il est nostre hons come devant et à eux autresi et excepté touz les seignours de cui nous tenons en fié par raison de nostredite contée et terre de Bourgoigne en l'Empire de ce et en tant come li fié le requiert tant soulement et excepté touz noz homes de toute nostre contée de Bourgoigne et de toute nostre terre de l'Empire et touz ces qui tiegnent et doivent tenir de nous en l'Empire d'anciainneté de droit ou de coustume de pais et exceptez ausi touz noz justisables lesquies homes et justisables voudroient faire et prendre droit pour nous devant nous ou devant nostre comandement et saves les alliances qui sont entre nous et le conte de Savoie contre lesquies nous ne volons ne entendons de riens aler per ces presentes lettres et excepté le dalphin de Vianne devantdit ou caus que li mariaige de nostre fille et de son fil se parfaroit Et est à savoir que se li uns de nous conte de Poitiers et Hugue de Chalon dessusdit met l'autre en guerre que il le metera en pas ou en estat covenable qui devera soffire Lesqueles aliances covenances et traictiez devantdit en la maniere que il est dessus dit et devisé nous contes de Poictiers et Hugues de Chalon dessusdit et chescun de nous en tant come elles nous touchent puent tochier et chescuns de nous prometons li uns à l'autre loialment et à bone foy par noz soirement doné corporelment sus sains ewangiles tenir garder et acomplir senz venir encontre par nous ne par autre en quelque maniere colour ou forme que ce soit et à ce oblige li uns à l'autre nous et nozdites terres de Bourgoigne en l'Empire c'est à savoir nous lidiz cuens nostredite conté et terre de Bourgoigne en l'Empire et je Hugues de Chalon ma terre dessusdite de Bourgoigne en l'Empire En tesmoignaige de laquele chose et à plus grant fermeté nous Phelippes cuens de Poitiers et de Bourgoigne et Hugues de Chalon dessusdit avons fait metre noz seaux en ces lettres donées à Orenge vint et quatre jours de mars l'an de grace MCCC et quinze