Charter Document - 02220596

Je Perrenez diz Ruillars borgois de Salins fais savoir à touz que con li nobles bers Jehans cuens de Bourgoigne et sires de Salins m'ait affrainchi et mon chasal qui siet en son bourt de Salins et touche d'une partie es murs de la closon de son bourt don li une partie est devant le molin es seignours de Saint Oyanz et li autre partie de l'autre part de ladite porte de toutes costumes que il ne autres y puisse reclamer et oit assiment afranchi mes hoir que je auray de mon cors que ledit chasal tanront et y demoront por ce que je et my hoirs devons refaire et afoitier toutes les portes et toutes les postelles des murs de la cloison de son bourt de Salins quant elles cherront ou depereront ou per fue ou coment que soit et il nous doit soignier bois et pammeles et angons et sarrures et ce que mestier y sera esdites portes et postelles refaitier je ay promis adit conte loialment et à bone foy tenir lesdites covenances En tesmoing de laquel chose je l'en ay baillié ces presentes lettres seelées dou seal dou chapitre de l'iglise de Saint Michiel de Salins Ce fut fait l'an de l'incarnacion Nostre Signour qui corroit par mil CC sexante et doux anz ou mois de jounnet