Charter Document - 02220595

Je Othes de Bourgoigne fais savoir à touz que je vuil et tien à bon et estauble taul don et tal establissement come mes sires papes Jehans cuens de Bourgoigne et sires de Salins fit et estaublit çay en arriers en la chapele de Monmaour c'est à savoir des dix livrées de terre qu'il asist à un chapelain sus les censes de Salins pour chanter tout jour en ladite chapelle pour s'arme et vuil que l'on rende chascunz anz [à] mons Guillaume d'Allay prevoire la dame de Monfacon lesdites dix livrées de terre cui nozdiz papes les dona et outroia à sa vie et comant à recevoir de mes tailles de Salins qu'il li rende chescun anz à jour qu'eles sunt estaublies de rendre senz atendre autre comandement de moy la tierce partie desdites dix livres Et pour ce que ce soit ferme chouse et estauble ay je seelez ces presentes leitres de mon seal pendant Ce fut fait l'an de l'incarnacion Nostre Signour qui corroit par mil CC et sexante et nuef ou mois de may