Charter Document - 02220594

Phelipes par la grace de Deu roy de Franche à touz ces qui ces presentes leitres verront et orront salut Sachent tuit que come Jehans de Chalon sires d'Allay Renaut cuens de Montbeliart Jehans de Bourgoigne Wauthiers de Monfacon Jehans sires de Facoigney Thiebaut de Nuefchestel Hombers sires de Cleresvaux Gauchiers de Chestelvilain Eudes sires de Monferrant Guillaumes sires de Corcondray Jehans d'Oiseler sires de Flagey chevaliers et Jehans de Jouz escuiers pour aux et pour Pierre seignour de Mernay Girart et Guillaume d'Arguel Jehans de Vihanne Symon de Monbeliart Estiene d'Oiseler signour de Vilenueve et Estevenet signour d'Oyseler escuier qui pour certaines causes n'estoient pas es parties de France lesqueles il ont pris en main quant à ce pour ochoison de la guerre qu'il avoient faite en la contée de Bourgoigne contre nostre volonté soient venuz à nostre acort et à nostre velonté pronuncié et declarié per nous en la forme et en la maniere qui est contenuz es lettres seelées de lour seaux nous volons que fait les rendaiges et les restablissement des domaiges que il doivent faire selonc la forme desdites lettres se noz genz ou cil de ladite contrée ont pris de lour heritaiges puis que ladite contrée vient en nostre main ou se il avoient riens pris dou lour ne domaiges fait fut per feu ou en autre meniere en brisant la treve que il lour soit rendu senz delay Et encor volons et outroions que lidiz barons ou li autres dessus nommez homes de ladite contrée ne soient contrainz de venir en l'omaige de nous ne de noz hoirs des heritaiges et des fiez que il tiegnent per la raison de la contée de Bourgoigne jusque à tantque il lour sera regardé per nous ne per nostre court lour paroles oies que il doivent entrer Après nous volons et outroions que lour bons us et lour bone costumes soient tenues et gardées entierement et les devons garantir vers le conte de Bourgoigne et ses hoirs de ce que ont meffait en ladite contrée dois le temps qu'ele vient en nostre main jusques à jour que ces leitres furent faites En tesmoing de laquel chose nous avons fait metre nostre seal en ces presentes lettres donées à Paris le jour de l'invencion sainte Croix l'an de grace mil CCC et on