Charter Document - 02220592
| Charter Number: | 02220592 |
|---|---|
| Cartulary Title: | Cartulaire de Hugues de Chalon (1220-1319) |
| Charter Language: | Latin |
| Charter Origin: | Royal |
| Charter Type(s): | Decree |
| Date: | 1293 |
| Date type: | Internal, A.D., Feast, Regnal |
| Resource Link(s): |
Patrimoine numérisé de Besançon - MS Droz 22 - Tome 2 (p.436) |
Charter:
Adolphus Dei gracia Romanorum rex semper augustus universis sacri Romani imperii fidelibus presentes litteras inspecturis graciam suam et omne bonum Noveritis quod nobis sedentibus pro tribunali anno Domini millesimo CC nonagesimo tercio sabbato proximo ante festum apostolorum Symonis et Jude per unanimem et concordem sentenciam principum comitum baronum et nobilium nostro consistorio tunc assistentium nobilis vir Johannes de Cabilone obtinuit quod si spectabilis vir Otho de Burgondia quem eidem dedimus inductorem et deffensorem super officio majorie Bisuntine juxta aliam sentenciam super hoc coram nobis obtentam ipsum in idem officium inducere et deffendere non posset in eodem utpote quia idem officium est infra civitatis Bisuntine fortalitia constitutum eumdem Johannem dictus comes in bona et possessiones extra muros Bisuntinos constituta pertinentia nobili viro Hugoni de Burgondia fratri comitis Burgundie dicti Johannis de Cabilone adversario super officio majorie predicte pro modo et quantitate ejusdem reddituum majorie deberet inducere et deffendere inductum quam inductionem et deffensionem si dictus comes nollet facere vel non posset illud comes idem suis patentibus litteris nostre celsitudini significare deberet vel si idem comes hujus modi litteras super hoc tradere recusaret dictus Johannes de Cabilone de hoc coram nobis docere deberet legitimis documentis et nos ex tunc eidem Johanni alium debe[re]mus dare inductorem et deffensorem super Hugonis predicti bonis et possessionibus memoratis ad quem inductorem et deffensorem sibi dandum in hoc casu presentibus nos obligamus juxta sententiam memoratam Datum anno Domini et die premissis indictione septima regni nostri anno secundo