Charter Document - 02220578

Nous Hugues cuens palatins de Bourgoigne et Alix sa fame faisons savoir à touz que se li mariaiges que nous avons pourpallez de Othenin nostre ainnez fil et de l'ainnée fille de Thiebaut conte de Bart vient à perfection nous nous enloions et prometons que nous sumes tenuz pour nostredit fil que lidiz Othes ne demandera es hoirs le conte nostre pere que il a de ses autres fames et aura outre les huit cenz livres que lidiz cuens de Bart prent ou puis de Salins chescun an pour le chalonge que lidiz cuens de Bart avoit oudit puis vers nostredit pere lesquex huit cenz livres lidiz cuens de Bart a doné adit Othenin en mariaige avez sa fille Et ce avons nous juré sus saints evangiles pour ledit Othenin à tenir fermement Et por ce que lidiz Otes ne puisse aler contre la covenance dessusdite nous enloions touz les biens et les possessions que adit Othenin puent et devoient venir de part nous et sumes tenuz dou tenir et dou faire tenir par nostredit soirement En tesmoin de laquel chose nous devantdiz Hugues et Alix avons mis noz seaux en ces presentes lettres Ce fut fait en l'an de Nostre Signour qui corroit par mil et CC et cinquante et ouit ou mois de marz