Charter Document - 02220577

Nous Hugues dux de Bourgoigne faisons savoir à touz que come nous aiens doné et estaubli plage mons Jehan de Chalon signour d'Allay nostre amé et feal oncle et rendour de vint mille livres de bons petit tornois c'est à savoir de la quinte partie et dou tout en la main de chier et amé coisin mons Jehanz de Barz signour de Poiseal pour cause dou mariaige qui doit estre fait entre notre chier et amé cousin Eduart de la contée de Barz et Marie nostre chiere suer liquex deniers sunt à paier à certains termes si come il est contenuz plus à plain es lettres seelées sus le traictié dou mariaige dessusdit nous prometons en bone foy adit mons Jehan luy garder de touz couz domaiges et missions que il soffreroit pour cause de la plagerie dessusdite et en obligons adit mons Jehan touz nos biens muebles et non muebles presenz et à venir et desdiz domaiges couz et missions le crerons par son simple soirement senz autre prouve En tesmoing de laquele chose nous avons mis nostre seal en ces lettres faites et donées à Bart sus Aube l'an de grace mil CCC et six le londi après la feste saint Barnabé l'apostre