Charter Document - 02220574

Nous Marguerite par la grace de Deu royne de Navarre de Champaigne et de Brye contesse palatine faisons savoir à touz que con discorde fut entre les nobles barons Jehan conte de Bourgoigne et signour de Salins d'une part et Thiebaut conte de Barz d'autre part come d'une chadiere que lidiz cuens de Barz disoit que ses peres avoit tenue ou puiz de Salins liquex puis est à devantdit Jehan conte de Bourgoigne et signour de Salins et de ladite discorde lesdites parties se soient mises sor nous pais en avons faites entre lesdites parties et nostre dit en disons en tel maniere que lidiz Jehans cuens de Bourgoigne et sires de Salins assigne adit conte de Barz ouit cenz livrées d'estevenens oudit puis de Salins chescun an à rendre adit conte de Barz ou à ses hoirs ou à son comandement à Salins chescun an la moitié à l'uictive de Pasques et l'autre moitié à la saint Remi ensigant celuy terme tant come lidiz Jehans cuens de Bourgoigne et sires de Salins vivra Et se lidiz cuens de Barz ou suy hoirs cestedite pas voloient tenir après le decès doudit conte Jehan de Bourgoigne et signour de Salins li hoirs doudit Jehan conte de Bourgoigne et signour de Salins assi come il lesdites ouit cenz livrées rendroient adit conte de Bart ou à ses hoirs es termes devantdit Et se lidiz cuens de Barz ou sui hoirs ne voloient tenir ladite pas après le decès doudit Jehan conte de Bourgoigne et signour de Salins lidiz cuens de Barz et sui hoir lour raison puent demander en toutes choses ansi come à jour que ces lettres furent faites Et ceste pas et cestes covenances li uns cuens et li autres ont juré sor sainz evangiles tenir loialment et à bone foy En tesmoignaige de laquel chose à la requeste de l'une et de l'autre partie nous avons mis notre seal pendant en ces presentes lettres Ce fut fait l'an de l'incarnacion Jhesu Crist qui corroit par mil et doux cenz et cinquante quatre le mardi après la Touz Sains