Charter Document - 02220573

Nous Othes cuens palatins de Bourgoigne et sires de Salins et je Jehans de Chalon sires d'Allay faisons savoir à touz que con discorde fut meue entre noz genz doudit conté de La Planée de Malpas et dou Laic Damwatier et de moy ledit Jehan et de mes genz de Joigne d'autre part sus acuns cernois et amortement de bois que nozdites genz havoient fait li uns sus les autres es bois d'e[n]viron Le Metabiez et environ le mont dou Mirour et nous eussiens doné plenier pooir nous lidiz cuens à mons Hude chevalier nostre chestelain de Pontallié et nous lidiz Jehans à Renaut de Noseroy mon chestelain de Chalemont pour nous et pour noz gens d'apasier ladite discorde et li duy chevaliers dessus nommé aient fait pas de ladite discorde ansi come il duy nous ont raporté à l'un et à l'autre en cel maniere c'est à savoir que il ont dit et acordablement ordené que noz genz doudit contey de La Planée de Malpas et dou Laic quittent donent et outroient permaignablement adit Jehan de Chalon signour d'Allay et es suens touz les cerniz abatiz et atefiz et tel droit come il pooient ne devoient avoir dois les boines que li duy chestelain ont mises acordablement par consoil de proudomes enver Joigne c'est à savoir dois le grant chemin par quoy l'on va dois Pontallié à Joigne à droit fiz par le plus haut dou mont dou Mirour et dois le plus aut doudit mont à la boine que l'on y a mise entre ledit mont et le bié dou Mareschat entre Corbaut vers le biez dou Metabiez Et ont dit et acordé que noz genz d'une part et d'autre ne doivent passer lesdites boines li uns sus les autres pour nul amortiz ne atifiement faire es bois Et doiz lesdites boines en aval demore li biez dou Metabiez communax esdites parties ne ne doivent passer ledit biez li uns sus les autres pour nul atifiement faire Et est à savoir que pour cest acort et pour ceste ordinacion faire par lesdiz chestelains je lidiz Jehans de Chalon sires d'Allay quitte done et outroie et delivre permaignablement pour moy et pour les miens esdites genz de La Planée de Malpas et dou Lait toutes les terres que je avoie recovrées sus les genz desdites viles entre La Planée et le Vaut en quelque lue qu'eles soient saulz prés et champs arables s'il houtres les avoient qu'il lour demore senz cressance faire et save la domeneure que je lidiz Jehans et my homes haviens devant ledit recouvre dois les terraux envers Vaut qui me demoure et à mes homes Et est à savoir que noz genz doudit contey ne doivent passer la voie par quoy l'on va dois le Mont Sainte Marie en La Riviere par desoz le Morchin pour nul atifiement faire sau ce que li bois qui est dois ladite voie en lay tanque à biez qui court par la valée de Vaut demoure communaux es uns et es autres pour usagier senz atefiz faire et senz les usaiges de bois que li uns hont sus les autres d'une part et d'autre es bois et saves les justices de touz les devantdiz leus qui demourent à ces cui eles devront estre et doivent Et nous lidiz cuens et je lidiz Jehans oy et diliganment entendu l'acort et l'ordinacion des devantdiz chestelains louons et outroions pour nous et pour noz hommes ledit acort et ladite ordinacion faite par lesdiz chestelains et l'avons bone ferme et estauble et la confermons et prometons que nous la tendrons et farons tenir à noz genz Et pour ce que ce soit chose ferme et estauble nous avons mis noz seaus pendant en ces presentes lettres en tesmoignaige de verté Faites et donées l'an Nostre Seignour corrant par mil CC et quatre vinz ou mois de may