Charter Document - 02220571

A touz ces qui verront ces presentes lettres Jehans Ploiebant garde de la prevosté de Paris salut Saichent tuit que par devant Andreu de Saint Denis et Guillaume dit de Monte clers juré notaire estaubliz de part nostre signour le roy ou Chestelet de Paris asques nous ajostons pleniere foy en ces caus et en grenour especialment quant à ce de part nous et en leu de nous commiz et envoiez furent en lour propres persones nobles homes mons Hugues de Chalon chevaliers signour d'Arlay d'une part et Jehan de Chalon son frere d'autre part enfanz jadis de noble baron home de bon[e] memoire mons Jehan de Chalon chevalier jadix signour d'Arlay et de Naelle don Dex ait l'arme [qui] disrent et affermerent en bone verité par lour soirement et par lour foy baillié es mains desdiz clers jurez eus avoir fait et acordé ensamble de l'assentement et dou consoil de lour afins et pruchains amis l'acort covenances et ordenances ci dessoz escriptes et devisées en la maniere que s'ensuet c'est asavoir que lidiz Jehans doit avoir tenir et percevoir pour tout le droit que il a peut et doit avoir en quelque maniere et pour quelque cause que ce soit ou puisse avoir pour raison de son partaige de pere et de mere et pour raison de testament le chestel et la chestellenie de Lile souz Monreal avez toutes les apartenances le chestel et la chestellenie de Viteaux et les apartenances le chestel et les apartenances de la vile de Broyes et toute la terre que noble dame madame Biatrix contesse de La Marche et d'Angolesme lour tante tient qui lour doit revenir par raison de succession Et est à savoir que es chesteaux et viles dessus nommés et es apartenances d'yeaux demoure et demorra à ladite dame le droit et la raison que ele y ha et tient tant come elle vivra et après le decès de ladite dame toutes les choses dessusdites doivent revenir et estre doudit Jehan senz partie doudit mons Hugue Et doit lidiz Jehans tenir en fié les choses dessusdites doudit mons Hugue son frere ou une partie d'ycelles se ensi est que il se puisse faire par raison et que il plaise adit mons Hugue Et est encores à savoir que les choses dessusdites doivent revenir adit mons Hugue ou à ses hoirs après le decès doudit Jehan Et ne se puet lediz Jehans defaire des choses dessusdites en maniere que elles ne retornoient et reviegnent adit mons Hugue ou à ses hoirs sauz ce que lidiz Jehans en puisse amonner pour le remede de l'arme de luy de l'acort et dou consentement doudit mons Hugue Et est encores à savoir que lidiz Jehans ne puet vendre les bois de la terre dessusdite ne des chestellenies se n'estoit de la volonté et acort de ladite madame la contesse et doudit mons Hugue et lidiz messires Hugues ne puet vendre nul bois se n'estoit de la volonté de ladite contesse tant come il tanroit la terre en nom doudit Jehan son frere Et se ansi estoit que ladite dame deffailloit lidiz messires Hugues ne porroit vendre nul bois se n'estoit de l'assentement doudit Jehan Et vout et acorda lidiz messires Hugues que lidiz Jehans tiegne touz les fiés dessusdit excepté le fié Druyn de Monmayn Et parmy les covenances dessusdites lidiz Jehans ne doit riens paier des debtes de son pere et en demoure quittes si come lesdites parties le confessarent par devant lesdiz clers jurez En tesmoing desqueles choses nous à la relacion desdiz clers juré avons mis en ces lettres le seal de la prevosté de Paris l'an de grace mil CCC et quinze le vanredi pruchain après la feste saint Luc evangelistre