Charter Document - 02220569

C'est li diz la volunté et la pronunciacion le seignour de Boisjuhant dou descort qui est entre mons de Chalon et mons Wauchier signour de Chestelvilain Premierement sus le descort de l'aigue qui est entre le val de Meges et le val de Syrox tanque à Chalame pronunce li sires de Boisjuant que por les doux aguiz fait desraignement dois La Doiz d'Ains tanque à La Chalame entre mons de Chalon et ledit mons Wachier douquel uns chescun de lour doux en fit un lidiz sires de Boisjuant metra boines à sa volonté et les boines mises à uns chescun demor[r]a ce qui sera devers sa partie et sa terre Item pronunce lidiz sires de Boisjuant que dois La Chalame en lay paissant par la voie nueve qui voit outre Jour ce que chescun tient par dever venz chescun demoure en sa possession droit façant de la proprieté et de la possession par le seignour de Boisjuant plenierement senz sollempnité de droit ne ne puent prover par lour homes taillables fors que par genz de franche condiction ou par lettres Et pronunce encor lidiz sires de Boisjuant que les boines mises se li uns ha riens sus la terre de l'autre li uns le doit eschangier à l'autre à regart à seignour de Boisjuant à plus près de la terre d'un chescun Et ce est fait par la volonté et par l'outroy desdiz mons Jehan de Chalon signour d'Allay et mons Wachier signour de Chestelvilain Item fut acordé que les bestes dou val de Meges et dou val de Sirox puent et doivent pasturer li uns sus les autres saulz domaige façant Et se ansi estoit que bestes fussent trovées en domaiges li domaiges doit estre esmendé et doit la grosse beste à seignour en la cui terre elle seroit trovée en domaige de jour un denier d'emende et de nuit douze deniers la menue beste une maille de jour et un denier de nuit en outre l'emendement dou domaige Tesmoing de toutes ces choses les seignez desdiz mons d'Allay et mons Wachier et mons de Boisjuant mis en cest presenz escript Donez à La Faviere près de Noseroy le londi après l'uictave saint Pierre et saint Poul l'an corrant par mil CCC et un