Charter Document - 02220567

Nous officiaux de la court de Besençon faisons savoir que par devant Bertholomel dit Bochet d'Arbois clerc notaire Reynon d'Arbois publiement et en droit a cogneu et confessé que il en non de Bonhonme Alixandre et Boniface ses maistres ay compé et acordé à noble home et puissant mons Jehan de Chalon signour d'Allay de tout ce que lediz messires Jehanz estoit tenuz à sesdiz maistres et obligié per raison de la tauble d'Arbois de Poloigney de Monmoret et de la moitié des choses que lidiz messires Jehans fit prendre es maisons des lombars d'Allay et de Bleterens pour tant con à sesdiz maistres en apartenoit en tel maniere que lidiz messires de Chalon doit et est tenuz à sesdiz maistres si come il dit et aferme en douze mile livres de bons estevenens ou de bons petit tornois laquel some d'argent est à paier et à rendre à sesdiz maistres par ensi come il est contenuz en unes leitres que lidiz marchant ont devers lour Et la some des douze mile livres paié lidiz Reynon ou non que dessus a promis et promet et est tenuz de faire rendre toutes manieres de lettres queles qu'eles soient ne de queque some qu'eles soient que tochent ne puent tochier ledit mons Jehan de Chalon sau que de plageries et especialment une lettre de trois mile et six cenz livres item une autre de doux mile et Vc livres item une autre de vint et un cenz livres item une autre lettre de mil livres en tel maniere et condicion que se lidiz maistres ou lour comandement des lettres dessus devisées et de toutes autres se puent joir et especialment en lour paiant chescun anz de la some de mil et cenz livres tant soulement Et avec ce personalment estaubliz par devant ledit notaire Boniface dessus nommez publiement et en droit ay cogneu et confessé luy louer et ratifier acepter et tenir pour fort et estauble en nom de Bonhonme son oncle et Alixandre son frere toutes les choses dessusdites Et ont promis lidiz Reynon et Boniface les choses dessusdites toutes ensamble et une chescune d'yceles par ly tenir fermes et estaubles senz venir encontre en tout ne en partie par lour soirement corporelment doné et sus l'obligacion de touz lour biens Et ont volu lidiz Reynon et Boniface en non que dessus que la some des douze mile livres dessusdites paié se acunes lettres lesqueles tochassent ou apartenissent ledit mons Jehan de Chalon saulz que de plagerie estoient trovées esdites taubles ou maisons d'Arbois de Poloigney ou de Monmoret lesqueles ne li fussent rendues qu'eles soient de nule valour En tesmoignaige de laquel chose nous officiaux dessus nommez avons mis le seal de ladite court de Besençon en ces lettres en la juridicion de laquel court lidiz Reynon et Bonifaces ont submis quant à ce lour et lour hoirs et touz lour biens Ce fut fait l'an Nostre Signour mil CCC et nuef le mardi après la feste saint Andreu l'apostre