Charter Document - 02220565

Nous Jehans de Chalon sires d'Allay et Guillaumes d'Arguel damoiseal faisons savoir à touz que nous de nostre bone volonté avons fait un eschange en la forme et en la maniere cy après devisée c'est à savoir que nous lidiz Jehans avons baillié quitté et outroié pour nous et pour les noz adit Guillaume et es suens en pur et perpetuel eschange nostre reviere dessouz Arguel et tout nostre droit accion et reclamacion que nous y avons qui comence dois l'ile souz le molin adit Guillaume et dure tanque à lieue d'Avenne Et je lidiz Guillaumes ay baillié adit mons Jehan de Chalon et es suens pour moy et pour les miens quitté et outroié en pur et perpetuel eschange ma reviere dessouz Arguel et tout le droit accion et reclamacion que je y ay qui comence à dessoz l'ile où la maison adit mons Jehan siet et part à la reviere Guillaume de Monjustin et dure le contre mont tanque à port de Dovaut et part à la riviere mons l'arcevesque de Besençon Et est à savoir que nous lidiz messires Jehans ne nostre hoir ne poons ne devons faire molin en la riviere laquele lidiz Guillaumes nous a baillié en eschange Et pour ce je lidiz Guillaume de madite riviere me suis devesti En tesmoing de laquel chose je lidiz Guillaumes ay baillié adit mons Jehan ces lettres seelées de mon grant seal pendant Faites et donées l'an Nostre Signeur corrant par mil CCC et wit le sambadi devant la feste de la nativité saint Jehan Baptiste