Charter Document - 02220564
| Charter Number: | 02220564 |
|---|---|
| Cartulary Title: | Cartulaire de Hugues de Chalon (1220-1319) |
| Charter Language: | French |
| Charter Origin: | Lay |
| Charter Type(s): | Agreement |
| Date: | 1308 |
| Date type: | Internal, A.D., Feast |
| Resource Link(s): |
Patrimoine numérisé de Besançon - MS Droz 22 - Tome 2 (p.363) |
Charter:
Je Guillaumes d'Arguel damoiseal fais savoir à touz que come je demandasse à noble home mon très chier et bien amé seignour Jehan de Chalon signour d'Arlay plusours griez et domaiges que lidiz messires Jehans et sa genz avoient fait moy et mes homes nobles frans taillables et esploitables desquies nobles sunt excepté Guillaume de Monjustin Morraille et Jehan de Cherenci de Bures de Erguel de Busy de Lerno de Pugy de Vilete de ma terre de toute la chestellenie d'Arguel durant la guerre de luy et de ces de Boisençon à la parfin par comun assentement doudit mons d'Allay et de moy je et lidiz messires d'Allay avons acordé finalment en tel maniere c'est à savoir que je pour moy et pour mesdiz homes desdites viles nommées ay quitté et quittois ledit mons Jehan de Chalon pour luy et pour ses hoirs pour moy et pour mes hoirs et pour mesdiz homes de touz les domaiges et griez que lidiz messires Jehans de Chalon et sa gent durant la guerre de luy et de ces de Besençon ont fait moy et à mesdiz homes et que pour raison de ladite guerre je ne midit homes avons sostenuz ni encorruz et pour les chemins fait de novel et pour raison de chevax que je demandoie adit mons Jehan de Chalon Et ceste quittance fais je et ay fait adit mons Jehan de Chalon parmi sept cenz livres de faible monoie desquex sept cenz livres je me tien pour bien paiez et en quitois ledit mons Jehan et ses hoirs Et pour ce je par ma bone [foy] ay promis et promet pour moy et pour mes hoirs et por mesdiz homes à porter loial garandie adit mons Jehan et es suens et appasier envers mesdiz homes de tous les griez et domaiges dessusdit s'ensi estoit que nuls de lour ne li en demandast riens et que je ne vendray encontre ceste quittance et pour ce je en obligois moy et mes hoirs et mes biens touz où que il soient Et en tesmoignaige de laquel chose je ay mis mon seal en ces presentes lettres et ay prié et requis honorable persone et discrete l'official de la court de Besençon par Symonin de Vax clerc juré que il mete le seal de ladite court en ces lettres avez le mien Faites et donées le londi après Reminiscere l'an Nostre Signour corrant par mil CCC et sait ou mois de marz