Charter Document - 02220560

Saichent tuit cil qui verront ces presentes lettres que de les discordes qui estoient entre les nobles barons Jehan conte de Bourgoigne et signour de Salins d'une part et Willame conte de Vianne d'autre des chestiaux des fiés et d'autres quereles il est concordé entre aus par le consoil des proudomes desdites quereles en tel maniere que touz li puis de Saint Corniere où lidit Jehans a fait fermeté demoure par ladite concorde adit Jehan et à ses hoirs à touzjours mais et lidiz Willames li a quitté et outroié à bone foy quanque il reclamoit ou devoit reclamer pour luy ou les suens fors que tantque se lidiz Willames cuens de Vianne ou ses genz avoient aucune chose ou pendant doudit puy ne pour fié ne pour demenure lidiz Jehans ou suy hoirs la puent conquerre par achat ou par don ou par eschange à regart de quatre chevaliers que soient mis des doues parties pour concorder les descordes c'est à savoir de Hombert de Monnet Jehan de Pusiez Haymon de Poloingney dit Juene et Jacons de La Tours chevaliers ou par les dous soverains qui y sunt mis par dessus c'est à savoir mons Amé signour de Monfacon et Thiebaut signour de Nuefchestel ou à regart de ces que y saront mis en leu de ceus se de ces defailloit Et assiment lidiz Willames a quitté adit Jehan et à ses hoirs quanque il devoit ou pooit reclamer ou puy et ou pendant dou puy où lidiz Jehans a fait fermeté que on apele Garde Chemin assis entre Montuin et Laons et tel droit et tel chalonge com lidiz Willames havoit et devoit avoir ou fié de Chestelvilain et ou val de Serous et en Mongifon quitte assiment adit Jehan et à ses hoirs Et lidiz Jehans cuens de Bourgoigne et sires de Salins a quitté et outroié adit Willame et à ses hoirs le fié de Monnet qui estoit de la baronie de Salins et lidiz Willames le doit tenir ligement doudit Jehan et de ses hoirs Et après lidiz Jehans a doné et outroié adit Willame et es suens quanque lidiz Jehans et li suens havoient et devoient avoir ou puy de Pymont que lidiz Willames doit tenir ligement doudit Jehan et lidiz Jehans li doit garantir contre toutes genz Et se lidiz Jehans ou ses genz avoient acunes choses ou pendant doudit puy et lidiz Willames les vuet conquerre il les puet et doit avoir et conquerre par don ou par achat ou par eschange à regart des devantdiz quatre chevaliers ou [d]es par dessus devant nommez ou [de] ces qui pour lour y saroient mis Et lidiz Jehans a doné assiment adit Willame et à ses hoirs en fié et en chasement cenz livrées de terre à estevenens que doivent estre assises à regart des devantdiz quatre chevaliers ou [d]es par dessus Après lidiz Jehans et lidiz Willames ont promis li uns à l'autre par lour soirement que il ne faront novel chestel ou val de Lons dois or en avant dois ledit chestel de Garde Chemin jusque à Valnantois et dois le chestel de Saint Corniere jusque à Chilley et dois Chillié jusque à Revigney et ont promis par lour soirement que il ne fermeront ne laisseront fermer à lour pooir le puis des Cordes dessus Conlige Et se autres quereles sorgeoient entre lesdiz Jehans et Willame ou entre lour genz que Dex ne doint elles ne doivent estre revangiés d'une part ne d'autre mais doivent estre acordées par les quatre devantdiz chevaliers ou par les par dessus ou par ces que y saront mis pour lour et toutes les autres quereles que sunt entre lour doux et entre lour genz et lour homes que ne sunt cy nommés Et par ceste pais et par cestes covenances lidiz Willames est entré ligement en l'omaige adit Jehan par ansi com il et suy devancier l'avoient esté et a recogneu les fié liges que sont cy nommé Après lidiz Jehans et Willames ont promis par lour soirement à assurier et fiancier ceste pais et cestes covenances à regart des devantdiz quatre chevaliers ou des par dessus ou de ces que y saroient mis pour lour En tesmoignaige desquex choses nos devantdiz Willames cuens de Vianne avons mis nostre seal en ces presentes lettres Ce fut fait en l'an de l'incarnacion Nostre Signour qui corroit par mil CC et cinquante et trois ou mois de octovre