Charter Document - 02220559

Je Thiebaus cuens de Barz fais savoir à touz ces qui ces lettres verront que com discorde fut entre moy d'une partie et le noble baron Jehan conte de Bourgoigne et signour de Salins d'autre partie come d'une chadiere que je disoie que mes peres avoit tenue ou puis ledit Jehan conte de Bourgoigne et signour de Salins paix en est faite en tel maniere que lidiz Jehans cuens de Bourgoigne et sires de Salins m'a assigné ouit cenz livrées d'estevenens oudit puis de Salins chescun anz à rendre à moy ou à mes hoirs ou à noz comandement à Salins chescun anz la moitié es huictaves de Pasques et l'autre moitié à la saint Remy ensigant celui terme tant come il vivra Et se je ou muy hoirs cestedite pas volons tenir après le decès doudit Jehan comte de Bourgoigne et signour de Salins suy hoirs ausi come il lesdites huit cenz livrées d'estevenans à moy ou à mes hoirs rendroient es termes devantdit et se je ou muy hoirs ne la voliens tenir nostre raison povons demander ansi come à jour que ces lettres furent faites en toutes choses après le decex adit comte de Bourgoigne Et ces covenances ansi con dessus sunt divisées ansi come je lidiz cuens de Bourgoigne sires de Salins avons juré sus sains evangiles tenir loailment et à bone foy En tesmoing de laquel chose j'ay mis mon seal en ces presentes lettres que furent faites l'an de l'incarnacion Nostre Signour mil CC et cinquante et quatre ans le mardi prochain après la Touz Sains