Charter Document - 02220556
| Charter Number: | 02220556 |
|---|---|
| Cartulary Title: | Cartulaire de Hugues de Chalon (1220-1319) |
| Charter Language: | French |
| Charter Origin: | Lay |
| Charter Type(s): | Agreement |
| Date: | 1294 |
| Date type: | Internal, A.D., Feast |
| Resource Link(s): |
Patrimoine numérisé de Besançon - MS Droz 22 - Tome 2 (p.348) |
Charter:
Nous Othes cuens palatins de Bourgoigne et sires de Salins faisons savoir à touz que come descort et guerre fust et eust esté par acun temps entre nobles homes noz biens amez et feaux Jehans de Chalon signour d'Allay nostre amé oncle d'une part et mons Hugue de Bourgoigne nostre amé frere d'autre part pour raison de la maierie de Besençon les appendises et les appartenances d'icely et pour les griez les domaiges et les injures et les violences que li unes des parties avoit fait à l'autre dou tems passé jusque à jour que ces lettres furent faites pour raison de ladite maierie et des choses qui en estoient ensegues à la parfin lesdiz mons Jehans signour d'Allay et mons Hugues de Bourgoigne nostredit frere pour ce personelment establiz de lour volonté et de lour consentement avons fait pax et acort entre lour des choses dessusdites en tel maniere que nous pour bien de pax d'acort faire et reformer entre lour avons revesti et baillié adit mons Jehan la possession de la maierie de Besençon et de toutes les appartenances d'yceli et avons promis adit mons Jehan que nous le ferons quitter à ces de Moncler de la fort maison de Moncler que il a prise et abatue et des domaiges que il lour a fait et l'en appaserons vers lours toutes les foiz que il ly en voudroient riens demander luy ou à ses freres et à ses aidanz Et par tant tuit li prison que li une partie tient de l'autre sunt quitte et delivré par lour despens paiant liquex despens seront taxé se point y avoit de descort à l'esgart de nobles homes mons Jehan de Monbeliart signour de Monfacun [et] de mons Hugue de Vilefaul signour de La Rochele Et par tant lidiz Jehans de Chalon pour luy et pour touz lez siens et pour touz ses aidanz a pardoné de bon cuer et de bone volonté adit mons Hugue et à touz les suens et à touz ses aidant tout le maltalant et le malcuer qu'il avoit à lour por raison des choses dessusdites et lidiz messire Hugues pour luy et pour les siens et pour touz ses aidant adit mons Jehan et à ses freres et les aidant ay pardoné ausi En tesmoing de laquel chose nous avons fait metre nostre seal en ces presentes lettres faites et donées le mecredi après la saint Vincent l'an Nostre Signour mil CC nonante et trois