Charter Document - 02220555

Ludovicus Dei gratia Francorum et Navarre rex universis presentes litteras inspecturis salutem Notum facimus quod in nostra presencia personaliter constitutis dilecto et fideli nostro Hugone de Cabilone domino de Arlato milite et Johanne de Cabilone dilecto ejus fratre dictus Hugo tradidit et assignavit dicto Johannis fratri suo pro partagio et nomine partagii tote successionis paterne et materne nec non causa seu debito vel ratione testamentorum parentum ipsorum castrum et castellaniam de Insula subtus Montem Regalem castrum et castellaniam de Vittello partem seu portionem quam habet ad presens dictus Hugo in domo forti de Broies una cum parte seu portione quam in dictis domo et pertinenciis tenet seu possidet Beatrix de Burgondia comitissa Marchie et Engolisme et que post ipsius Beatricis decessum ad dictos fratres redire debet quam partem ex nunc ut ex tunc tradidit et assignavit dictus Hugo Johanni fratri suo predicto si supervivere contigerit comitissam supra dictam cum omnibus locorum omnium predictorum et pertinenciarum suarum juribus deveriis onere et redigentiis quibuscumque et quocumque nomine censeantur cum feodis omnibus castellaniarum et locorum ipsorum excepto feodo Droconis de Monte Medio tenenda possidenda et expectanda a dicto Johanne quamdiu solum vitam duxerit in humanis et post ipsius Johannis decessum ad dictum Hugonem vel heredes ipsius integre reditura acto et concordato quod si contingeret dictum Hugonem de assensu dicti Johannis regere et tenere loca et pertinencias predictas dictus Hugo aliqua de boscis seu forestis dictorum locorum vendere vel distrahere non poterit sine assensu et voluntate dictorum comitisse et Johannis et quod dictus Johannes castrum et castellaniam de Insula cum juribus onere et redigentiis ac pertinenciis suis pro quibus dictus Hugo est in fide et homagio nostris tenebit ad fidem et homagium a dicto Hugone in retro feudo tantum nostro et pro ipsis remanebit dictus Hugo in fide et homagio nostris prout est et erat antea dicto Johanne predicta tenente quoad vixerit et explectante nec tenebitur dictus Johannes de debitis defuncti Johannis de Cabilone quondam domini de Allato patris eorundem fratrum aliqua persolvere Promittens dictus Hugo bona fide sua et juramento corporaliter prestitis premissa omnia et singula dicto Johanni fratri suo tenere complere servare et contra non venire per se vel per alium quomodo libet in futurum sub obligatione omnium quorumcumque bonorum suorum ubicumque existentium et quocumque nomine valeant et debeant censeri Dictus vero Johannes de presentibus omnibus et singulis sibi ut premittitur traditis et assignatis pro omni partagio successionis paterne et materne ex causa seu debito vel ratione testamentorum predictorum se contentum tenuit prout confessus est ibidem Et per hec omnibus que pro successione paterna et materna et causa seu debito vel ratione testamentorum ipsorum a dicto Johanne et ejus heredibus posset petere in futurum renunciavit specialiter et expresse et contra predicta vel aliquod de predictis per se vel per alium quomodo libet non venire fide sua et juramento corporaliter prestitis promisit et in predictis sic sibi traditis et assignatis idem Johannes dictum Hugonem et heredes suos de omni successione paterna et materna ex causa seu debito vel ratione testamentorum ipsorum imperpetuum et irrevocabiliter quittavit penitus et absolvit sub bonorum omnium suorum ubicumque existentium ypotheca Acto et concordato ab eodem Johanne quod quandiu premissa tenuerit et explectaverit aliqua de boscis seu forestis aut aliis predictis vendere vel quomodo libet distrahere non poterit nisi de voluntate dictorum comitisse et Hugonis poterit tamen elemosinare de bonis dictorum locorum comitisse et Hugonis ipsorum interveniente assensu Renunciantes eciam dicti fratres hinc inde omni exceptioni lesionis circonventionis et omni juri dicenti renunciacionem generalem non valere et omnibus exceptionibus juris et facti scripti vel non scripti nobis humiliter supplicarunt ut in premissis omnibus prout acta et concordata inter eos existunt nostrum prebere vellemus assensum Quorum supplicationi annuentes benigne premissa omnia et singula quantum in nobis est volumus laudamus et hiis nostrum prebemus assensum In cujus rei testimonium ad dictorum fratrum supplicationem et majorem certitudinem premissorum sigillum nostrum fecimus hiis apponi Actum apud Vincennas penultima die octobris anno Domini millesimo CCC quinto decimo