Charter Document - 02220553

Je Amarriz sires de Jouz fais savoir à touz que con je eusse guerre à noble baron Jehan conte de Bourgoigne et signour de Salins je ay fait pas à luy en tel maniere que je cognois estre ses hons liges dou chestel de Jou et de la roche que li cuens ferma d'autre part sus La Cluse et de Bovenens et de Corvieres et cognois que Boneval est dou fié le conte sauz le droit l'abbé de Saint Benigne de Dijon et tien en fié et en chasement ce que je ay à Hostaux et à Damartin de luy de part le conte Estevenon son pere Et de ce que je disoie que je avoie estans et boines de pladoier à luy je l'en ay quitté et cognois que je doy torner en sa court et faire droit des plaiz et des quereles de nous dous à la conue de sa court et quit adit conte ces qui vont à Salins pour sal porter des ventes Et sache l'on que dou chalonge que je avoie dou reis d'Espiers vers le Mont Sainte Marie nous nous sumes agranté que les boines des reis sont par la fontaine de Coterel par la voie des Chevaux par Tandeure par le fornial Pierre de La Planée par la fontaine de Mutelle ansi con li ruissiaux de celle fontaine decourt ou lay save la justice de la vile dou Lay Damwatier et le droit que je sires de Jour ay en ladite vile et par le mont de Grailles par Nutabetun par la Froide Fontaine et par le pendant de Montron devers Metabié par la roche de Alpere par le pertuis sus Valorbe et dois lesdiz termes envers le Mont Sainte Marie sunt li reis et la signorie mons le conte de part la signorie de Salins Et conois que par ensi come je suis homs ledit conte je suis entrez en l'omaige Ysabel la contesse sa fame et des hoirs que il a [de la]dite contesse Ysabel par le comandement de luy meismes save sa feauté Et pour ce que la pais soit plus ferme et plus estauble ma fame Huguete et muy enfant Henry et Jehans sunt entré en l'omaige ledit conte et à sa fame la contesse et es hoirs que ladite contesse a dou devantdit conte Jehan Et fais encour savoir que toutes les foies que lidiz cuens se blameroit que je fusse issuz de ladite pax que jà n'aviegne et je en seroie requis de luy ou de son comandement je en doi torner en sa court pour l'adracier et se je ne fasoie ensi je li enlie et met en sa main et des suens touz mes chasés et mes fiez que il s'en venissent à luy sanz contredit tant que je l'eusse amendé à la conue de sa court et toutes les foies que li auroie amendé à la conue de sa court selonc ce que je auroie mespris my chasez et muy fiez doivent revenir à moy ou es miens sanz chaloinge Et vuil et pri et requier mons l'apostoille et mons l'arcevesque de Besençon se je ne tenoie la pais par ensi con ele est contenue en ces presentes lettres que il tenissent jostice de moy et de ma terre tanque je fusse rentrez en ladite pais et ceste pais à garder et à tenir entierement ay je juré et ma fame et muy enfant sus sainz evangile En tesmoing de laquel chose je ay selé ces lettres presentes de mon seal Ce fut fait ou mois de may l'an de l'incarnacion Nostre Signour qui corroit par mil CC et cinquante