Charter Document - 02220550
| Charter Number: | 02220550 |
|---|---|
| Cartulary Title: | Cartulaire de Hugues de Chalon (1220-1319) |
| Charter Language: | French |
| Charter Origin: | Lay |
| Charter Type(s): | Confirmation |
| Date: | 1290 |
| Date type: | Internal, A.D., Feast |
| Resource Link(s): |
Patrimoine numérisé de Besançon - MS Droz 22 - Tome 2 (p333) |
Charter:
Je Perrins de Thoraise fiz çay en arriers mons Hugon de Monferrant signour de Thoraise fais savoir à touz que come Willemins Morraille fiz çay en arriers mons Perron d'Arguel soit devenuz hons de main et de bouche de noble baron mons Jehan de Chalon signour d'Allay et ait pris de luy en fié et en chasement cenz soudées de terre de son aluez lesquex il doit asseoir adit mons Jehan deenz six an continuelment ensigant lesquex encomençant à la feste saint Michiel prochainement venant à regart de proudomes et se lidiz Willemins ne avoit fait ladite assise deenz ledit terme assi con devisez est il est tenuz de paier adit mons Jehan cenz livres en nom de faigne promise par stipulacion ledit terme passez à la requeste doudit mons Jehan je à la requeste doudit Willemins me suis establiz plages en la main doudit mons Jehan de cinquante livres d'estevenens prometanz par mon soirement doné que se lidiz Willemins failloit desdites covenances adit mons Jehan je à sa requeste li paieroie lesdites cinquante livres d'estevenens ou delivreroie gaiges portaubles et metables ou pais desquex il porroit avoir lesdites cinquante livres en un marchié et ce promet je Et pour que ce soit plus certaine chose je ay requis à religious home et saige Guillame par la grace de Deu abbé de Buillon à metre son seal en ces presentes lettres Faites et donées l'an de grace l'an MCCIIIxx et dix le diemanche devant saint Michiel