Charter Document - 02220549

Nous officiaux de la court de Besençon faisons savoir que Hugonin de Vianne frere de noble home mons Phelippe de Vianne signour de Paigney a promis en droit et en jugement par devant nos et par son soirement doné sus sains evangiles à noble baron Jehan de Chalon signour d'Allay presenz et stipulanz que il maintenra par devant luy come signour dou fié le plait et la cause que il a meu ou entent à movoir contre mons Hugue de Vianne chevalier fiz à devantdiz mons Phelippe pour tel raison come lidiz Hugues a et doit avoir ou chestel de Pymont et es appendices de yceluy lesques choses il a cogneu en droit et en jugement par devant nous estre dou fié adit mons Jehan de Chalon et que il ne fera pax acort ne quittance ne vendue ne transaction ne alienacion en quelque main ne en quelque meniere que ce soit et que il porsuigra ladite cause ensi come il est dessus dit jusques à fin de quereles senz querir essoignes ne dilacions fuers que de droit Encor a confessé lidiz Hugues en droit par devant nous que il a baillié quitté delivré et vendu quitte baille delivre et vent à devantdit mons Jehan de Chalon tout le droit et toute la raison que il puet avoir à maintenant ou pourroit avoir ou temps à venir ou devantdit chestel de Pymont ou terretoire et es appartenances d'yceluy pour tel pris come messires Girars sires d'Arguel et messires Jehans d'Oyseler sires de Flagey chevaliers doivent dire et ordener de aut et de baus douquel pris li devantdiz Hugues et messires Jehans de Chalon les doivent croire senz aler encontre par lour soirement Et pour toutes ces choses tenir senz aler encontre fermement lidiz Hugues a obligey en la main adit mons de Chalon luy et touz ses biens muebles et non muebles presenz et à venir En tesmoing de laquel chose nos à la requeste doudit Hugue avons mis le seal de la court de Besençon en ces presentes lettres faites et données le sambadi après feste de saint Barnabé l'apostre l'an Nostre Signour corrant par mil CCC et VII