Charter Document - 02220548
| Charter Number: | 02220548 |
|---|---|
| Cartulary Title: | Cartulaire de Hugues de Chalon (1220-1319) |
| Charter Language: | French |
| Charter Origin: | Lay |
| Charter Type(s): | Promise |
| Date: | 1312 |
| Date type: | Internal, A.D., Feast |
| Resource Link(s): |
Patrimoine numérisé de Besançon - MS Droz 22 - Tome 2 (p.327) |
Charter:
Nous Hugues dux de Bourgoigne faisons savoir à touz que come pour certaine cause li roys de France mes sires fut tenuz à nostre chier uncle mons Jehan de Chalon signour d'Allay en la some de quatre mile livres de tornois fors et lidiz rois mes sires ait volu que nous paions et façons gré pour luy et en nom de luy adit nostre oncle desdites quatre mile livres qui doivent cheoir et venir en la paie et estre rabatues de la some que nous devons adit roy mon signour dou mariaige de madame la reyne de Navarre nostre chiere suer de laquel some de quatre mile livres nous avons fait paier et fait gré à nostredit uncle de huit cenz livres de tornois fors ou puis de Salins en la paie des doux termes passez de la rente que l'on nous y doit et devons à nostredit oncle de la remanance desdites quatre mile livres trois mile et doux cenz livres desquiex nous li prometons en bone foy et sus l'obligacion de noz bienz paier et faire gré à cest paiement prochain de Bart mil et doux cenz livres à la feste de la Touz Sains ensigant doux mil livres en parfaçant à luy ou à son comandemant la paie entiere desdiz quatre mil livres pour le roi mon seignour devantdit Et se lidiz nostre oncle estoit de riens domaigiez par le deffaut de la paie desdiz III et II livres pour les termes dessusdit nous sumes tenuz et volons estre tenuz de faire gré et paier touz les domaiges que il encorroit pour le deffaut de nostre paie devantdite En tesmoint de ce nous avons fait metre nostre seal en ces lettres donées en juigney le sambadi après l'Apparicion l'an de grace mil trois cenz et onze