Charter Document - 02220546

Nous Merguerite par la grace de Deu jadis reyne de Jherusalem et de Sezile faisons savoir à touz que con discors fut entre le noble baron Robert duc de Bourgoigne nostre chier oncle d'une part et le noble home mons Jehan de Chalon signour d'Allay en non de noble dame madame Marguerite sa fame nostre chiere tante et ou non doudit Jehan pour la raison de ladite Marguerite sa fame d'autre sus l'eschoite damoiselle Biatrix jadis dame de Monreal laquel eschoite ensamble toutes ses obventions et touz ses droiz lidiz Jehans ou nom come dessus disoit apartenir et devoir apartenir à ladite Marguerite et à luy par raison de ladite Marguerite quant à la tierce partie per raison de pruchaineté li devantdiz duc disant encontre et affermant les devantdites choses apartenir et devoir apartenir à luy per plusours raisons à la fin nous vuillanz et desirant la pais entre les parties dessusdites requerimes et priames à grant instance le devantdit duc et ledit Jehan ou nom que dessus qu'il nous donassent pooir de faire de dire et de ordener à nostre volonté doudit descort laquel chose les parties dessusdites ou nom come dessus outroiarent à nous et encour à nostre priere nous donarent pooir de declairier et de interpreter des choses dessusdites et des appartenant à ycelles se riens y avoit oscur ne dotous toutes foiz que mestier seroit et que il nous pleroit et nous retenimes en nous ceste chose Lesquies choses ensi faites nous pour bien de paiz disons volons et pronunçons que ladite Marguerite et lidiz Jehans ses mari ou non come dessus quittoient pour aux et pour lour hoirs à devantdit duc et à ses hoirs tout le droit touz le profit que il pooient avoir et avoient en l'eschoite dessusdite à temps que ladite Biatrix morut et touz droiz et touz profiz que il ont ou puent avoir en ladite eschoite ou par occasion ou par cause de ladite eschoite à maintenant Pour laquel chose façant nous disons volons et pronunçons que li devantdiz dux pour luy et pour ses hoirs assée bailloit et delivroit à ladite Marguerite fame doudit Jehan pour li et pour ses hoirs et adit Jehan ou nom de aux le chestel de Viteaul c'est à savoir la forteresce de Viteal senz pris c'est à savoir les murs et les maisons qui sunt dou domoyne à signour item la vile tout l'autre domoyne les fiez et toutes autres choses apartenant adit chestel pour mil livrées de terre à tornois en tel maniere que se lesdites choses ne soffisoient à l'assise desdites mil livrées de terre li dux parfaroit lesdites mil livrées de terre autre part à plus près covenablement pour les doues parties à nostre regart Et toutes les choses qui saront bailliées à ladite Marguerite et à ses hoirs et adit Jehan ou non d'aux saront tenues en fié doudit duc et de ses hoirs et seront bailliés en tel condiction que se la dame d'Allay moroit senz hoirs de son cors que jà n'aviegne ou li hoir de son propre cor sen hoir de lour propre cors les choses dessusdites repaireroient adit duc de Bourgoigne et dois enqui en avant cil venroient à l'eschoite qui y devroient venir par droit ou par costume Item li devantdiz dux sera tenuz de garandir la devantdite dame d'Allay et ledit Jehan ou non de li contre touz creanciers qui porroient riens demander à ladite Merguerite ou adit Jehan ou non de li pour cause de la succession dessusdite quant à la tierce partie de touz les debz que messires Hugues de Bourgoigne pere de ladite Biatrix devoit à temps que il morut Et est à savoir que lidiz Jehans ne sui hoir ne porront riens demander adit duc de Bourgoigne ne à nostre chiere tante Ysabel par la grace de Deu jadis reyne des Romains ne à lour hoir de debtes que messires Hugues deut ou peust devoir à ladite dame d'Allay ou adit Jehan son mari par raison dou mariaige desdiz Jehan et Marguerite ainz prometent à garantir contre touz cex qui porroient riens demander pour les causes dessusdites le devantdit duc et ladite Ysabel Et volons que lettres soient faites seelées des seaux des parties sus les choses dessusdites et pronunciés en la maniere et en la forme dessus contenue Et encour disons que à nostre regart ladite dame d'Allay puisse aumoner des choses dessusdites Et retenons nous dou consentement des parties dessusdites que nous puissons entrepreter et declairier quant es choses dessusdites toutes foiz que mestier sera et il nous plera Et nos Robers dux de Bourgoigne dessusdiz Merguerite et Jehans ou non de ladite Merguerite et pour ly et pour nous en tant con il nous appartient et puet apartenir à laquelle Merguerite nous Jehans avons doné pooir et actorité quant es choses dessusdites approvons louons et volons et confermons tout quanque est dit volu et pronuncié par nostre chiere dame Merguerite par la grace de Deu jadis royne de Jherusalem et de Secile dessusdite et prometons En tesmoint desquex choses toutes dessusdites nous dessus nommée Merguerite par la grace de Deu jadis reyne de Jherusalem et de Sezile Robers dux de Bourgoigne Jehans de Chalon sires d'Allay et Merguerite sa fame de l'auctorité et de l'assentement d'ycelui Jehan nostre signour et nostre mari avons mis nos seaux en ces presentes lettres faites et données l'an de grace MCCIIIxx XIX ou mois de marz