Charter Document - 02220545

Nous Robers dux de Bourgoingne faisons savoir à touz que con descor fut entre nous d'une part et Merguerite nostre amé[e] suer et mons Jehan de Chalon signour d'Allay son mari nostre amé feaul et frere ou nom de ladite Merguerite et pour loy d'autre part sus l'eschoite damoisele Biatrix jadis dame de Monreal laquele eschoite ensamble toutes les obventions et touz les droiz ladite Merguerite de l'autorité et dou consentement doudit Jehan son mari et lidiz Jehans ou nom come dessus disoient apartenir et devoir apartenir à ladite Merguerite et à luy por raison de ladite Marguerite quant à la tierce partie par raison d'eschoite nous disant encontre les devantdites choses et affermant apartenir et devoir apartenir à nous pour plusours raisons à la parfin acordez est entre nous et ladite Marguerite et ledit Jehan ou nom de ladite Marguerite en tel maniere que ladite Marguerite et lidiz Jehans ses mariz ou nom com dessus nous quittent et ont quitté pour nous et pour noz hoirz touz les profiz que il pooient avoir en l'eschoite dessusdit[e] à temps que ladite Biatrix morut et tout droit et tout profit que il ont ou puent avoir en ladite eschoite ou par occasion ou par cause de ladite eschoite à maintenant Et nous pour ce asseons baillons et delivrons à ladite Marguerite fame doudit Jehan pour li et pour ses hoirs et adit Jehan ou nom de aux le chestel de Viteaul c'est à savoir la forteresce senz prix c'est à savoir les murs et les maisons estanz dedenz ladite forteresce qui estoient en nostre demoyne item la vile tout l'autre domoyne les fiez et toutes les autres choses apartenant adit chastel pour mil livrées de terre à tornois en tel maniere que se lesdites choses ne suffisoient à l'assise desdites mil livrées de terre nous sumes tenuz de parfaire autre part à plus près covenablement pour nous et pour les devantdiz Marguerite et Jehan Et toutes les choses que nous baillons à ladite Marguerite et à ses hoirs et adit Jehan ou nom de aux soient toutes en fié de nous et de noz hoirs et lour baillons en tel condicion que se ladite dame d'Allay moroit senz hoirs de son cors que jà n'aviegne ou li hoirs de son propre cors senz hoirs de lour propre cors les choses dessusdites repaireroient à nous et à noz hoirs dux de Bourgoigne et dois enqui en avant cil vendroient à l'eschoite qui i devroient venir par droit ou par costume Item nous sumes tenuz de garantir la devantdite dame d'Allay et ledit Jehan ou non de li contre touz creanciers qui porroient riens demander à ladite dame d'Allay et adit Jehan ou nom de li pour cause de la succession dessusdite quant à la tierce partie de touz les debz que messires Hugues de Bourgoigne pere de ladite Biatrix devoit à tems que il morut c'est à savoir que ladite dame d'Arlay lidiz Jehans ses mariz ne lour hoirs ne porroient riens demander à nous ne à nostre chiere dame et suer Ysabel par la grace de Deu jadis royne des Romains ne à noz hoirs des debtes que lidiz messires Hugues puet devoir à ladite dame d'Arlay ou adit Jehan son mari pour raison dou mariaige de ladite dame d'Allay et auxi lidiz Jehans ne sui hoir ne porront riens demander à nous ne à ladite royne ne à noz hoirs de debte que lidiz messires Hugues puet devoir à Marguerite fame doudit Hugue pour raison dou mariaige de ladite Marguerite ainz sunt li devantdite dame d'Allay et lidiz Jehans ses mariz tenuz nous et ladite royne et noz hoirs garantir contre touz ces qui nous et ladite royne porroient riens demander por les causes dessusdites Et volons que ladite dame d'Allay nostre suer puisse asmonner acune choses des choses dessusdites à regart de nostre chiere dame et niece Marguerite par la grace de Deu jadis royne de Jherusalem et de Sezile Et volons ausi que li deffaut de l'assise desdites mil livres de terre se deffaut y avoit liquex doit estre assis à plus près de Viteaux covenablement pour les parties soit fait à regart de ladite royne nostre chiere niece Lesquex choses En tesmoint de laquel chose nous avons mis nostre seal en ces presentes lettres faites et donées l'an de grace mil CC quatre vinz et XIX ou mois de marz