Charter Document - 02220544

Come discors fut entre nobles homes mons Jehan de Chalon signour d'Arlay d'une part et de mons Hugue de Vianne seignour de Paigney en nom de luy et de dame Merguerite de Ruffey sa fame d'autre part sus le veconté la justice la signorie et les emendes de Blaterens et des appartenances esques emendes et viconté lidiz messire Hugues demandoit la tierce partie en nom que dessus lidiz mons d'Allay disant que si con lidiz Hugues devoit avoir la tierce partie lidiz messire d'Allay et ses genz pooient amaindrir les emendes à lour volonté de rechiez sus la justice et la signorie des homes doudit mons Hugue en nom que dessus lesquies il a ou chestel de L'Estoille et en la chestellenie sus lesquex homes lidiz Hugues de Vianne disoit lui avoir toute justice [et] toute signorie lidiz messire d'Allay disant le contraire et sus plusours autres choses fiés et querelles à la parfin lesdites parties ont volu expressement que nous Jehans de Bourgoigne poissiens ordener entre lour et appasier desdiz descors par droit par pais ou par volonté et ont juré sus sains evangiles de tenir et garder ce que nous en ordonerons de aut et de baux et pronuncerons et sus la poinne de doux cenz mars d'argent Et nous reçu en nous cest compromis et enquis diliganment dou droit des parties dessusdites ordenons et avons ordeney prononçons et avons pronuncié sus lesdiz descort en la maniere qui s'ensuet c'est à savoir que nous avons dit et ordené que touz li droiz que lidiz Hugues de Vianne en nom de luy et de sa fame susdite a ou puet avoir ou viconté et en la justice et es emendes de Bleterens et de la chestellenie demoure à toutjoursmais adit mons Jehan signour d'Allay et à ses hoirs excepté la justise des homes doudit mons Hugues et de madame Merguerite de Ruffey sa fame et de lour mès que il ont à Blaterens et en la chestellenie et es apartenances desquies homes li justice grant et petite demor[r]a à lour et à lour hoirs ensamble toutes lour autres rentes et lour proprieté que il ont à touzjoursmais senz riens retenir adit Jehan signour d'Allay fuers que le fuer cri pour deffendre Blaterens et la chestellenie seuz que contre ledit mons Hugue et ses hoirs se acuns y venoient à armes efforciement prendre proies ou pour tenir autres domaiges Et ensi doivent li homes adit mons d'Allay deffendre les homes doudit mons Hugue et de ses hoir et les emendes de ces qui ne y soient à fuer cri des homes doudit mons Hugue et de sa fame saroient conmunes adit mons d'Allay et adit mons Hugue et à lour hoirs lesquies amendes doivent estre jugiés par ledit mons Jehans signour d'Allay et par ledit Hugues de Vianne ou par lour comandement Et ne puent riens demander lidiz Hugues ne dame Merguerite sa fame en ce que il disoient que li bois de Bleterens estoit ferme es conmunes et en lour droit Oncour avons nous pronuncié nous Jehans de Bourgoigne dessusdit que en recompensacion de ladite justice et dou viconté de Bleterens liquel demoure adit mons d'Allay et es suens ensi come dessus est dit toute li justice grant et petite demoure adit mons Hugue de Vianne en non de luy et de sa fame dessusdite et à lour hoirs en lour homes et en lour mès que il ont ou parrochaige de L'Estoille et quitte à lour et à lour hoirs lidiz messire Jehans sires d'Allay tout le droit que il avoit sus lourdiz homes et sus les homes de lour fiez ou parrochaige de L'Estoille en justice grant et petite ou en autres servituz senz riens retenir à luy sauz le fuer cri pour aidier à deffendre le chestel de L'Estoille et la chastellenie se mestier estoit sauz que contre ledit mons Hugue de Vianne et sa fame dessusdite et lour hoirs Et assi li homes doudit mons d'Allay doivent deffendre les homes doudit mons Hugues et de sa fame dessusdite et de lour hoirs et les emendes desdiz homes doudit mons Hugue et de sa fame qui ne iront à fuer cri seront communes esdiz mons d'Allay et adit mons Hugue et saront et devront estre jugiés par lour ou par lour comandement Oncores disons et ordenons que lidiz Jehans sires d'Allay doige doner et asseter en nom que dessus adit mons Hugue de Vianne et à Merguerite fame doudit Hugue et à lour hoirs perpetuelment en nom de ladite recompensacion ouit livres de monoie corrant en la dyocese de Besençon es finaiges d'Allay de Bleterens et de L'Estoille à regart de mons Jehan de Bourgoigne dessusdit et que lidiz messires Jehans sires d'Allay doige aquerir de mons Jaique de Cherrain chevalier tout quanque il a en fié et en demeneure es viles de Vers et de Belmont et que tout ce que il aquerra soit doige estre et demore esdiz Hugue de Vianne et à Merguerite fame doudit Hugue et à lour hoir Oncores avons nous dit et ordené que li homes doudit Hugue de Vianne et de sa fame dessusdite [qui] demoroient deanz le point de la franchise de L'Estoille se il y vuillent demorer et y soient habitant et demorant es propres mès doudit mons d'Allay y seront de la condicion de ces de la franchise et se il tiegnent point de terre doudit Hugue de Vianne et de sa fame ele demor[r]a adit Hugues et à sadite fame et à lour hoir toute quitte et se li mès où il demorent sont de la terre doudit Hugue de Vianne et de sa fame il lour demorerant de la condicion de lour autres homes qui demorent ou parochaige de L'Estoille Oncore disons et ordenons nous Jehans de Bourgoigne dessusdit que se acuns des homes mons d'Allay tiegnent des mès doudit mons Hugues de Vianne et de sa fame à Bleterens ou Allay ou à L'Estoille ou es chestellenies de cesdiz leus il doivent venir per devant le comandemant doudit mons Jehan signour d'Allay et se il ne monstrent senz dilacion à la requeste doudit Hugue de Vianne et de sa fame ou de lour comandement raison clere et evidant per quoy il doigent tenir lesdiz mez il les guerpiront et laisseront adit Hugue de Vianne en nom que dessus Et assi se acuns des homes doudit Hugue de Vianne et de sa fame tiegnent esdiz leus des mès doudit mons Jehan signour d'Allay il vendront par devant le comandement doudit Hugue de Vianne en nom que dessus et se il ne monstrent raison clere et evidant per quoy il les doigent tenir il les guerpiront et laisseront adit mons Jehan signour d'Allay Et toutes les choses dessusdites lesquex estoient dou fié doudit mons d'Allay demorent de son fié assi con elles estoient devant Oncores disons et ordenons que lidiz Jehans sires d'Allay ne doige ne puisse tenir ou avoir homes en comant en la terre doudit Hugue de Vianne ne de sa fame ne en lour fiez ne en lour rierefiez se il ne sunt amasez en ses propres mès et en sa propre terre et assi lidiz Hugues en nom come dessus ne puisse avoir ne tenir homes en comant en la terre doudit mons Jehan signour d'Allay en ses fiez ne en ses rierefiez se il n'estoient amasez en ses propres mès et en sa propre terre Et retenons à nous par la volonté et par le consentement desdites parties que nous puissons amender et declairier nostredite pronunciacion se il y avoit point d'oculte tanque à la feste de la saint Remy prochainement venant et que se nuls autres descort movoit de novel que jà ne soit entre lesdites parties ou lour hoirs nous en puissons cognostre et ordener ensi con bon nos sembleroit tanque à ladite feste de saint Remy Lequel dit et laquel pronunciacion nous Jehans de Chalon sires d'Allay Hugues de Vianne sires de Paigney et Merguerite de Ruffey fame doudit Hugue bien avisée et de certaine science volons louons et aggreons prometanz [] En tesmoing de laquel chose nous Jehans sires d'Allay Hugues de Vianne et Merguerite fame doudit Hugue avons mis noz propres seaux en ces presentes lettres et avons prié et requis le devantdit mons Jehan de Bourgoigne qui toutes ces choses dessusdites a dit et pronuncié que il mete son seal avec les nostres [] Doné à Laons le londi après le diemanche que l'on chante Quasimodo l'an Nostre Signour corrant mil CCC et quatre ou mois d'avril