Charter Document - 02220543

Nous Phelippes diz de Vianne sires de Paigney et Jehans ses freres sires de Mirebel en montaigne faisons savoir à touz que con li nobles bers Jehans diz de Chalon sires d'Allay ait en gaige de nos nostre terre c'est à savoir Mirebel Chestoillon et les appendises Annores et La Maison Deu de Lone et les appartenances et il nous ait fait grace come de delloier ladite Maison Deu de Lone et de oster de sa main pour faire nostre volonté nous volons et outroions loialment et en bone foi adit Jehan signour d'Allay que il teigne en sa main lesdiz chesteaux Mirebel et Chestoillon et les appartenances tanque il soit paiez entierement de quanque je lidiz Jehans de Vianne doy adit Jehan de Chalon signour d'Allay ne ne li poons demander ne requerre lesdiz chestiaux ne les apartenances tanque paié li aions entirainement ce que je lidiz Jehan de Vianne li doy en deniers nombrez mas par les yssues desdiz chesteaux à comper et rabatre à regart de noz amis et des siens En tesmoignaige de ceste chose nous avons mis noz seaux pendant en ces lettres faites et donées l'endemain de la saint Martin d'yver l'an Nostre Signour corrant par mil doux cenz octante et trois