Charter Document - 02220542

Nous université de la cité de Besençon faisons savoir à touz que con descors fut meuz entre nous d'une part et Girart d'Arguel pour luy et pour ses serours et pour ses freres et dame Guillame sa mere et pour les suens d'autre part sus le terreige de Aillant et sus les autres appartenances assis ou parochaige de Fontens en bois en prez en terres gaignables en plains et en toutes autres apartenances à la fin nous avons acordé en tel meniere que messires Pierres sires de Paluel doit departir et deviser entre nous et ledit Girart pour luy et pour ses serours et pour ses freres et pour sa mere et les suens ledit terretoire en bois en plains et en toutes autres partenances et tel partaiges con lidiz sires de Paluel fera nous le volons et l'outroions et le tenons à gré et prometons que nous ne vendrons jamais encontre et de tel partaige come li sires de Paluel [fera] entre nous et le devantdit Girart pour luy et ses freres et sa serours et sa mere et les suens nous devons baillier lettres seelées de nostre seal à regart de luy adit Girart Et pour chiez dou descors qui estoit entre nous et ledit Girart des domaiges que nous diens que li force de sa genz nos avoit fait et des domaiges qu'il disoit que nous li aviens fait nous l'avons mis à la volunté et à l'ordenement dou noble baron et nostre redoté signour Hugue duc de Bourgoigne Et pour que ceste chose soit ferme et estauble nous avons seelez ces presentes lettres de nostre seal en tesmoignaige de verité Ce fut fait l'an de l'incarnacion Nostre Signour qui corroit per MCC et sexante et siez anz