Charter Document - 02220539

Nous Jehans de Chalon sires d'Allay et nous Hugues de Vianne sires de Paigny faisons savoir à touz que come discors fut entre nous Jehans de Chalon dessusdit signour d'Allay d'une part et Hugues dessusdit signour de Paigney d'autre part sus le fié de Chestoillon en montaigne sus le fié de Mongnet et sus plusours autres fiez choses et quereles nous desdiz discors nous sumes compromis en noble home mons Jehan de Bourgoigne signour de Montaguz et avons volu et outroié expressement que lidiz messires Jehans de Bourgoigne nous puisse acorder et appasier desdiz discors aut et bas par pais ou par droit ou par volonté et avons promis et encour prometons par noz soirement doné sus sainz evangile de Deu corporelment touchié et sus la poinne de doux cenz mars d'argent tenir et garder fermement l'ordenacion et la pronunciacion doudit Jehan de touz les discors qui estoient [et] estre pooient ou devoient entre nous en quelque maniere que ce fut Et nous lidiz Jehans de Bourgoigne sires de Montaguz de la volunté dou consentement et à la requeste des devantdiz mons Jehan de Chalon signour d'Allay et de mons Hugue de Vianne signour de Paigney avons pris receu et retenu en nous cest compromis en la maniere dessus et avons ordené et pronuncié en la maniere que cy après s'ensuet par la volunté et par le consentement desdites parties c'est à savoir que li fiez de Chestoillon en montaigne assis sus la reviere d'Ayns lequel tenoit messire Jehan de Vianne de mons Phelippe de Vianne çay en arriers son frere et pere dou devantdit Hugue de Vianne signour de Paigney et par consequent tenir le devoit doudit mons Hugue lidiz messires Hugues le doit quitter adit mons Jehan de Chalon signour d'Allay et en recompensacion de ce lidiz Jehans de Chalon sires d'Allay doit baillier paier et delivrer adit mons Hugue douze cenz livres de monoie corrant en l'arceveschié de Besençon à la value de la monoie le roy de France Encor disons et ordenons que lidiz messires Jehans de Chalon donoit quittoit et outrooit et delivroit adit mons Hugue de Vianne signour de Paigney et es suens à touzjoursmais touz le fié que Estienes de Neblens jadis sires de Daignens tenoit ou tenir devoit doudit mons d'Allay fut en homes en justices grant et petites en bois en terres ou en toutes autres choses quies qu'eles fussent et especialment tout quanque li signour de Degnens ont tenuz ou tenoient doudit mons d'Allay et nommeement dois le chaisne de Desnens envers Brayme Et pour ces choses lidiz Hugues de Viane sires de Paigney dessusdit doit garantir adit mons d'Allay pour luy et ses freres germains de pere et de mere ledit fié de Chestoillon quant à ce que à lour appartenir en porroit ou devroit et d'autre part pour ses moindres freres de part pere come avoiers Et se ansi estoit que li termes d'avoerie passé lidiz petit freres vousissent avoir recors ou poissent pour raison adit fié quant à la partie que à lour en apartanroit ou appartenir devroit et il l'emportassent ou porter deussent par raison lidiz messires Hugues doit paier et rendre adit mons d'Allay la moitié des dessusdites douze cenz livres sauz ce que par son soirement lidiz messire Hugues ne puet faire partaiges à sesdiz petit freres par quoy la moitié doudit fié que à luy et à ses freres germains appartient ou apartenir doit puisse ou doige avenir en la main de sesdiz petis freres Et est à savoir que lidiz messires Hugues doit deffendre et garantir ledit fié de Chestoillon adit mons Jehan et à ses hoirs sauz le droit de ses petiz freres ensi con dessus est dit Et se ansi estoit que droit ou costume de pais le feit perdre adit mons Jehan lidiz messires Hugues li doit rendre les douze cens livres dessusdites et promet en bone foy aidier à pourchacier adit mons Jehan ledit fié de Chestoillon par son soirement ne metra empaichement ne fera metre par quoy lidiz messire Jehans ne eut le fié Item doit lidiz messires Hugues conoistre adit mons d'Allay touz les fiés desquies messires Phelippes de Vianes ses peres estoit en la foy mons d'Allay en la maniere que il y estoit et faire li en doit lettres Item disons et ordenons nous Jehans de Bourgoigne dessusdit que se lediz messires Hugues de Vianne ou messires Phelippes de Vianne jadis ses peres avoient point de droit ou fié que li sires de Cleresvaus tient ou doit tenir dou seignour de Cusel soit et doige demorer à touzjoursmais adit mons d'Allay et à ses hoirs et li fié de Belevevre que lidiz messires Hugues ou ses peres tenoient ou tenir devoient doudit mons d'Allay demoure et doit estre à touzjourmais adit mons Hugue et à ses hoirs senz riens retenir audit mons d'Allay ne es suens Item disons ordenons et pronunçons que lidiz messires d'Allay et li sien ne puissent ou doigent reclamer justice[ne] signorie es homes es Templiers de Girefontaine es viles de Panthaise et de Monterbert Item disons et pronunçons que quant li nobles princes Robert dux de Bourgoigne comandera adit mons Hugue que il entroit en l'omaige doudit mons d'Allay dou fié de Mirebel en montaigne que il y doige entrer senz contredit et si ansi estoit que jà ne soit que le dux morut devant ce qu'il eut fait comandement adit mons Hugue d'entrer en l'omaige doudit mons d'Allay doudit fié ledit messires Hugues y doit entrer par la lettre eue doudit duc devant sa mort ou par le comandement de son hoir qui le duchame tenroit ou de celuy à cui partie lidiz fié vendroit Item disons et pronunçons que lidiz messires d'Allay ne puisse ne ne doige tenir ne avoir homes ne comant en la terre doudit mons Hugue ne de sa fame dame Merguerite de Ruffey ne en lour fié ne en lour rierefiez se il ne sunt amasez en ses propres mès et en sa propre terre Item disons et ordenons que dou fié de Mugnet lequel lidiz messires Hugues doit tenir de mons d'Allay nous puissons conostre et ordener à nostre volonté Item volons que lidiz messires Hugues ne puisse ne ne doige tenir ne avoir homes ne comans en la terre doudit mons d'Allay ne en ses fiez ne en ses rierefiez ne ladite Merguerite de Ruffey sa fame se il ne sunt amasez en lour propres mès et en lour propre terre Et retenons à nous par la volonté et par le exprès consentement desdites parties que nous puissons amender et declarier nostredite pronunciacion se il y avoit point d'oculte tanque à la feste de saint Remy prochainement venant ou si deanz adonc nous [ne] poions avoir fait lesdites parties ont volu expressement que nous puissons ledit terme p[r]oloignier tanque à la nativité Nostre Signour après ensigant et que se aucuns d'autres descors venoit entre les parties ou lour homes de novel que jà ne soit que nous en poissons cognoistre et ordener tanque à ladite feste de saint Remy ou tanque à la nativité Nostre Seignour après ensigant se mestier est ensi con bon nos sembleroit Liquel dit et laquel pronunciacion nous li devantdit Jehans de Chalon sires d'Allay et nous li devantdit Hugues de Vianne sires de Paigney come bien avisé de nostre certaine science volons louons et outroions que nous consentons dou tout en ycelui et prometons per noz soirement donés sus sainz evangiles de Deu corporelment tochiez pour nous et pour noz hoirs que nous ne vendrons encontre en tout ne en partie par nous ne par autrui ne consentirons que autres y viegne ains li garderons à touzjoursmais et à ce obligons nous et touz noz biens et noz hoirs En tesmoignaige de laquel chose nous Jehans de Chalon sires d'Allay et nous Hugues de Viannes sires de Paigney dessusdit avons mis noz propres seaus en ces presentes lettres et avons prié et requis le devantdit mons Jehan de Bourgoigne qui toutes ces choses dessusdites a dit pronuncié et de nostre volunté et consentement que il y mete son seal avez les nostres Et nous Jehans de Bourgoigne dessusdit qui ces choses avons dites et pronunciées à la priere et à la requeste des devant nommez avons mis nostre seal pendant en ces presentes lettres avez les lour seaus Ce fut fait outroié et doné l'an Nostre Signour corrant par mil CCC et quatre le londi après la quinzaine de Pasques ou mois d'avril