Charter Document - 02220537

Je Estiene fil dou noble baron Jehan conte de Bourgoigne et signour de Salins et je Johanne fame doudit Estienne fille çay en arieres Gauthier signour de Vaignorriz faisons savoir à touz que nous pour noz necessaires besoignes despagier avons receu à empront bon et loial dou noble baron Jehan conte de Bourgoigne et signour de Salins nostredit pere doux mile livres de tournois en deniers nombrez lesquies nous avons paié à noble baron Thiebaut roy de Navarre de Champaigne et de Brye conte palatin nostre signour pour nostre terre de Waignorriz aquiter et delivrer lesques doux mile livres nous avons promis par noz soirement sur sains evangiles corporelment doné à rendre et à paier adit conte ou à son certain comandement qui ces presentes lettres auroit six mois après la requeste faite à nous ou à l'um de nous lequel que ce soit doudit Jehan conte nostre pere ou de son certain comandement qui ces presentes lettres auroit Et à plus grant seurté nous avons [donné] et mis en gaige en la main doudit conte nostre pere ou de son comandement qui ces lettres auroit pour lesdites deux mile livres toute nostre terre de Vaignorriz et toute la terre que avenue et eschoite nous est doudit Gauthier jadis signour de Vaignorriz nostre pere et avons enloié encour en la main doudit conte nostre pere et de son comandement qui ces lettres auroit touz noz biens et noz possessions presenz et à venir muebles et non muebles pour lesdites doux miles livres de tornois lesquies receu avons doudit conte nostre pere ensi con dessus est dit Et est à savoir encour que nous avons promis adit conte nostre pere par nozdiz soirement que nous contre la devantdite gagiere et les devantdites covenances ne vanrons par nous ne par autruy ne consentirons à nostre pooir que autres y viegne et que nous ladite gagiere maintendrons et garantirons adit conte ou à son comandement qui ces lettres auroit contre toutes genz à droit Et avons guerpi touz droit et toute costume et abrenuncié à l'excepcion de non eue non receue et non nombrée pecune et à toute autre excepcion et droit qui valoir ou aidier nous porroient à venir contre le devantdit empront et ladite gagiere et volons et outroions que se nous ne paiens la devantdite some de pecune ansi con dessus l'avons promis que lidiz cuens nostre pere ou ses comandement qui ces lettres auroit pooit panre et tenir de sa propre auctorité nostre devantdite terre et touz noz biens ensi con dessus enloié les avons Et est à savoir que se lidiz cuens nostres peres ou ses certains comandement avoient riens receu de nostredite terre avant que lesdites doux mile livres de tornois lour fussent perpaiés ce que receu en seroit comperoit l'on et rabatroit de la devantdite some desdites doux mile livres Et en tesmoing de ce avons nous mis noz seaux pendant en ces presentes lettres et à noz prieres et à noz requestes nostre honorable pere en Jesus Crist Guillames par la grace de Dieu arcevesques de Besençon et messires Guyz de Rens sires de Roches ont mis lour seaux pendant en ces presentes lettres en plus grant tesmoing de verté Ce fut fait le diemanche après l'invencion de la Croiz l'an de l'incarnacion Nostre Signour qui corroit par mil doux cenz sexante et trois