Charter Document - 02220536

Je Othes de Bourgoigne fiz çay en arriers le noble baron Hugue conte palatin de Bourgoigne fais savoir à touz que je ay promis et promet par mon soirement corporelment doné sus sainz evangile à noble baron Jehan conte de Bourgoigne et signour de Salins mon pere et [à] la noble dame Lore contesse de Bourgoigne et dame de Salins sa fame et es enfanz que lidiz Jehans cuens a de ladite Lore contesse sa fame tenir et garder toutes les covenances que li devantdiz Hugues cuens palatins de Bourgoigne mes peres lour avoit ensi con il est contenuz es lettres que lidiz Jehans cuens de Bourgoigne et sires de Salins et ladite Loré contesse sa fame ont doudit Hugues conte mon pere seelées de son seal et dou seal à la noble dame Alis contesse palatine de Bourgoigne ma mere En tesmoint de ceste chose j'ay mis mon seal pendant en ces lettres Ce fut fait le mecredi après l'uictive de saint Thimotée et de saint Syphoriain l'an Nostre Signour qui corroit par mil CC sexante et sept