Charter Document - 02220534

Nous Jehans de Chalon sire d'Arlay Renaut de Bourgoigne cuens de Mombeliart Jehans de Bourgoigne Jehans de Mombeliart sires de Monfacon Wathiers de Monfacon Thiebaut sires de Nuefchestel Jehans sires de Faucoigniez Wachiers de Commercy sires de Chestelvilain Jehans d'Oyseler sires de Flagey Guillaumes sire de Courcondray Humbers sires de Clerevaux Eudes sires de Monferran et Jehans sires de Jouz faisons savoir à touz ces qui verront et orront ces presentes lettres que come nous tuit ensamble et chescun par soy de nostre propre volunté nous soions mis en la volunté ou dit et en l'ordenement de très haut et très excellenz prince nostre honoré signour mons Phelippe par la grace de Deu roy de France sus acuns griez lesquies nous li avions fait ou conté de Bourgoigne puis qu'il vient en sa main et il ait dit volu et ordené que nous faciens refaire les chestiaux de Clerevaux et d'Ornens et la saule de Pontallié et que nos restaublissons les heritaiges lesquies ont esté pris par nous ou par acun de nous ou par noz genz doudit conté de Bourgoigne ou des genz du contée de Bourgoigne puis que lidiz contée de Bourgoigne vient en la main nostre signour le roy devantdit et que nous rendiens et amendiens touz les griez et les domaiges lesquies ont esté fait par nos ou par acun de nous ou par noz genz à contée et es genz dou contée dessusdit dedant les trieves et que nous soions tenuz d'aplagier fiancier et de obligier nous l'un pour l'autre de faire et acomplir les choses dessusdites lequel dit et ordenement nous avons loué et louons et prometons chescun par soy à touz les autres et à chescun par soy et tout ensamble l'un à l'autre en nostre bone foy et par nostre soirement doné corporelment sur sains evangiles et sus l'obligacion de touz noz biens et par sollempnel stipulacion de attendre parfaitement et acomplir tout ce qui est devant et après dit Et volons consentons et prometons en la forme et en la maniere dessusdite chescun par soy à touz les autres et à chescun par soy et touz ensamble l'um à l'autre de rendre ce qui sera trové par les enquesteours le roy que chescun de nous aura eu par soy ou par ses genz desdiz heritaiges ou d'autres choses pendant lesdites treves et de aidier à refaire les chestiaux et la saule devantdit et de aministrer et baillier ce qui sera mestier à refaire selon l'ordenement l'arbitraige et la volenté doudit Vathier de Monfacon et de mons Symon de Mombeliart signour de Montron ou de l'um d'eaux se l'autre n'i pooit ou n'i voloit entendre Et prometons volons et consentons ensi come dessus de garder de domaiges l'um l'autre et que se nul de nos estoit ou deffaut de acomplir acunes des devantdites choses que tuit li autres soient tenuz par la foy et par le soirement et par l'obligacion devantdite de tout lour pooir de luy contraindre par la prise de ses biens muebles et non muebles à garder et acomplir parfaitement tout ce qui est devant dit et chescun de nous se met et submet quant à ce en la juridicion et ou pooir des autres et de chescun d'yceus et vuet et consent par la foy le soirement et l'obligacion dessusdite que tuit li autres et chescun d'yceux puissent de lour propre auctorité et volonté senz nul plait et senz conissance et senz jugement de nul autre prendre occuper tenir vendre et engagier lesdiz biens pour acomplir tout ce qui est desus dit et que nul de nous ne dira ne fera ne à autruy ne consentira rien par quoy ces covenances et promesses soient nulles ou anullées en tout ne en partie Et renonçons tuit ensamble et chescun par soy à toute excepcion dilacion et raison de droit escript de costume ou de fait qui à ce porroient nuire et especialment à droit qui dit que cil que se submet à la juridicion d'autruy se puet repentir devant plait entammé et à droit qui dit que se li droit de l'arbitreur n'est rasonable qu'il puisse estre ramené à raison et à droit qui dit que general renonciacion ne vaut En tesmoignaiges des choses desusdites nous tuit ensamble et chescun par soy avons mis noz propres seaux pendant en ces presentes lettres qui furent faites l'an de grace MCCC et un le mardi après feste saint Jaique et saint Phelippe presenz Jaquet de Noseroy bailliz de la terre doudit mons Jehan de Chalon et Guillame de Moustier Autepierre clerc à ce apelez pour tesmoing