Charter Document - 02220533

Nous Hugues cuens palatins de Bourgoigne et nous Alix contesse palatine de Bourgoigne faisons savoir à touz que nous avons promis à Jehan conte de Bourgoigne et signour de Salins nostre chier pere que nous li garderons saverons et deffendrons loialment et à bone foy à nostre pooir les bois et les jouz et que nous n'empacherons ne farons empagier ne ne soffrirons que autres empagoit ne destorboit à nostre pooir en nostre terre la vendue et la marcheandise dou sel des puiz de Salins nostredit pere mais tanrons et maintanrons à nostre pooir ces devantdites choses en la maniere et en l'estat que lidiz cuens les tenoit à temps de la confection de ces lettres Et ce avons nous promis per nostre soirement adit conte et à ses hoirs garder et tenir pour nous et pour noz hoirs et nozdiz hoirs enloyons en tel maniere que lidiz cuens nous a promis en bone foy que per tel division et tel partaiges et tel eschange con il a fait entre nous et ses autres enfant tanra et gardera et que encontre ne vanra ensi con il est contenuz es lettres que faites en sunt derrieinement devant cestes que de luy en avons et se encontre venoit per aventure lidiz cuens de nulle valour fussent ces presentes lettres En tesmoing de ces choses nous avons mis noz seaux pendant en ces lettres Ce fut fait l'endemain de l'an nuef l'an Nostre Signeur qui corroit mil et doux cenz et sexante et quatre