Charter Document - 02220532

In nomine sancte et individue Trinitatis Nous Jehans cuens de Bourgoigne et sires de Salins faisons savoir à touz [] que come nous aions à nostre bon senz et en nostre bone memoire devisé doné et outroié à noble baron Hugue conte palatin de Bourgoigne nostre ainnez fil de nostre premiere fame sa partie de noz biens et de nos tenours et de nostre signorie après nostre decest nous volons outroions et prometons par nostre soirement fait sus sains evangiles corporelment pour nous et pour noz hoirs à tenir et garder la devise et la partie que fait li avons et volons quelle soit tel come ele est divisée et contenue es lettres que il a de nous que de ce furent faites devant ces presentes lettres laquel devise et laquel partie lidiz Hugues nostre ainnez fil a pris à gré par nostre priere et par nostre requeste et nous a promis come loial fil par son soirement que il outre la partie que devisé li avons pour ce que il est ainnez et pour le grant mariaige de deniers d'avoir et de terre que de sa mere nous remest ne demandera nulle chose ne fera demander en nulle maniere pour partie es autres enfant que nous avons et aurons de noz autres fames Et après con nous aions eu consoil de proudomes et de saiges que li enfanz de noz autres doux fames doivent partir par moy nostre remanant pour bien pour pité et pour ce que contenz ne naisse entr'aux nous devisons en nostre boen senz et en nostre bone memoire les parties de noz autres enfant que nous avons et aurons de noz autres fames esposées c'est à savoir de la contesse Ysabel nostre seconde fame qui fut fille mons Robert de Courtenay et de la contesse Lore qui est nostre tierce fame esposée qui fut fille mons Symon de Conmercey en tel maniere que nous donons et outroions pour partie à Jehan nostre ainnez fil de la contesse Ysabel le chestel de Bracon et le borc si come il se porte dois Feruse envers Bracon et le parc dessus Bracon si come il est jusques à la porte de Bracon avec ce qui y siet et li donons la maison que nous avons fait en nostre bourc de Salins ou chasal qui fut Estevenin le Fevre Et à Estevenet nostre fil qui fut nez après ledit Jehan de ladite Ysabel donons en sa partie le chestel de Rochefort et les appendises et le chestel de Montenot et la tour de la Fontaine Benoite qui est delez les murs de Salins en coste Saint Anathoile Et à Perrin nostre tierz fil de ladite Ysabel donons et outroions pour partie Valampoliere et ce qui apent et Chestelbelin et la fort maison devant qui a nom Graimbert Et es enfanz que nous avons et aurons de la contesse Lore devantdite donons et outroions pour lour partie le chestel de Chalamont et le val de Meges et ce qui apent et avez ce lour donnons le chestel de Monmaour et les abergement de Faloise et la combe dou Fraigne et quanque nous avons establi et estaublirons apartenir à cesdiz leus et lour donons à Salins une fort maison qui a nom Chestelguyon A Montenout volons que appende quanque nous avons en fiez en demeneures et en garde tanque lay où li territoire de Cernans devers Salins faut si que Cernans en est et quanque nous avons en fiez et en demeneures et en garde dois la Froide Fontaine qui est entre l'ospital de Chalemont et Vilers senz lesdiz abergement et ladite combe que doné avons es enfant que nos avons et aurons de ladite Lore Cil qui tanra Bracon ne puet crestre le chestel ne le borc de Bracon fors que par anqui où fermé sont Cil qui tanra Chestelbelin se puet crestre de forteresce par devers Clucey tan come luy plera et par devers Salins noient Cil qui tanra la maison de la Fontaine Benoite se puet crestre de fermeté par domaiges rendant tanque à quarante piez de la voie que va vers Saint Anathoile par desus la vigne Vuillemet Senebron et tanque à quarante piez dou vergier à tresorier [de Besençon] Cil qui tanra Chestelguyon se puet crestre de fermeté tanque ou cemetiere de Saint Anathoile et tanque à curtil mons Perron de Ceys et tanque à cultiz mons Colin Petit Cusin par domaiges rendant Après volons et comandons que li enfanz que nous avons de la devantdite Ysabel et cil que nous avons et aurons de ladite Lore partent par my toutes noz autres rentes que nous avons denz les murs de Salins save trois mile livrées de rente que lidiz Hugues nostre fil doit avoir ou puiz de Salins en sa partie que de nous aura après nostre decest don nous avons retenuz six cenz livrées de rente par son outroy pour faire nostre volunté et come il est contenuz es lettres que de luy en avons Et volons et comandons que il partent par my les fiez dou poeyz et les chasez et la signorie de la vile et le remanant de la signorie de Salins et le remanant des maeries et des prevotés denz les murs et fuers des murs et les vignes et les prez que nous avons denz le val de Salins et les homes que nous avons ou bourc le conte de Bourgoigne volons que il partent par my Et volons et comandons que cil de noz enfant des devant nommées fames c'est à savoir de la contesse Ysabel et de la contesse Lore qui plus aura fuers des murs de Salins en homes et en rentes es parties que devisé lour avons se li autre ou acun d'aux se plaignoient face recompensacion et torne es autres en sa partie dou puiz de Salins à l'esgart des proudomes Et si ansi estoit que nostre enfant de ladite Ysabel c'est à savoir Jehans Estevenet et Perrins eussent sospeçon que la partie que nous devisons et donons à noz enfant de ladite Lore vaulsit myaux que la lour partie nous volons que li trois enfant Jehans Estevenet et Perrin s'acordoient tuit troy ensamble que il preignent pour la lour partie cy dessus devisée la partie que devisé et doné avons à noz enfant de ladite Lore et cinc cenz livrées de terre davantaige ou puiz de Salins de la partie es enfant que ladite Lore a de nous et aura Et est à savoir que nous retenons en nostre pooir les fiez de la signorie de Salins et ces de la signourie que nous muet dou conte Estevenon nostre pere que devisé doné departi ne ordoné n'avons pour ordener departir et deviser bien et loialmant entre nostre ainnez fil Hugue conte palatin de Bourgoigne et nouz autres enfant que nous avons et aurons de noz autres doux fames c'est à savoir de la contesse Ysabel et de la contesse Lore devantdites Et volons et comandons que tuit nostre hoir chescun selon ce que il tanra de nostre heritaige soient tenuz de paier noz aumones et noz debtes et de emender noz clains et de outroier et garantir les fiez que doné avons à ces cui doné les avons Et se de noz enfanz devantdiz de ladite Ysabel moroit li uns senz hoir de son cors nous volons que li autre duit partent l'eschoite entre aux et nostre ainnez fiz de ladite Ysabel ait adès Bracon et se li dui moroient senz hoir de lour cors le tierz ait l'eschoite et se il moroient tuit troi senz hoir de lour cors Blanche nostre fille de ladite Ysabel ait l'eschoite et se nostre quatre enfanz de ladite Ysabel moroient tuit senz hoir de lour cors l'eschoite remanroit es enfanz que ladite Lore auroit de nous Et ansi [se] des enfanz que ladite Lore a de nous et aura moroit li uns senz hoir de son cors l'eschoite saroit à ces qui demoroient ou à celuy qui demoroit et se il moroient tuit senz hoir de lour cors nous volons que li echoite revenit à noz hoirs de ladite Ysabel Et se Jehanz nostre fil [ainnez] de ladite Ysabel descordoit de nostre devis devantdit nous volons que li devantdit Hugues cuens de Bourgoigne et la contesse sa fame aient et preignent avec Bracon et avec le bourc de Bracon et le parc dessus Bracon mil livres d'estevenens l'an pour lour costes de la garde de Bracon en la rente que devisé et doné avons à devantdit Jehan à Salins et ou puiz de Salins et pour les domaiges que receu auroient pour ledit descors tanque lidiz Jehans fut revenuz à nostre devis devantdit et le remanant de la partie doudit Jehan partiroient entre auz Estevenet et Perrin nostrediz fil quant il auroient agranté et juré à tenir les parties et nostre devis devantdit Et se lidiz Estevenet et Perrin ne voloient louer nostre devis tel con il est contenuz es lettres que faites en sunt nous volons et comandons que cil qui tanroit les forteresces que devisé lour avons en lour partie c'est à savoir Valampolieres Montenout Chestelbelin Grimbert et la tourt de la Fontaine Benoite juroient sur sains [evangiles] à conte et à la contesse de Bourgoigne devantdit que il lesdites forteresces ne rendroient ne à Estevenet ne à Perrin devantdiz ne [à] autruy pour lour tanque il aient outroié et juré nostre devis devantdit ensi come noz lettres que faites en sunt le contienent et que il feront joir le devantdit conte et la contesse de Bourgoigne et noz enfanz de ladite Lore et à celui qui à nostre devis s'acorderoit de la partie celui qui descorderoit de nostre devis chescun selon ce que il auroit receu de domaiges pour ledit descort Et volons et requerons que nostre redoté sires Willames par la grace de Deu arcevesques de Besençon et quiconques après luy sera arcevesques de Besençon soit execoutours de cel devis con fait et ordené avons de nozdiz enfanz ensi con il est contenuz en ces lettres et es autres qui faites en sunt et li prions et requerons que il excommunioit ces ou celui de noz enfanz qui contre nostre devantdiz devis iront Et en tesmoint de ces choses avons nous fait seler ces presentes lettres de nostre seal et dou seal à religious abbés de Rosieres Ce fut fait en l'an de l'incarnacion Nostre Signour mil et dous cenz et sexante l'endemain de la circoncision Nostre Signour