Charter Document - 02220531

Je Othenins de Bourgoigne et nous Lore contesse de Bourgoigne et dame de Salins et je Jehans de Chalon sires de Rochefort et je Estienes de Chalon sires de Vaignorriz et je Perrins li Boviers faisons savoir à touz ces qui verront ces lettres que come li nobles bers Jehans cuens de Bourgoigne et sires de Salins mariz à nous dite Lore et pere à noz enfanz eust fait division et partaiges de ses biens et de sa terre et de ses chestiaux entre nous per ses lettres pendant nous ladite Lore pour noz enfanz que doudit conte avons et nous lidiz Othenins de Bourgoigne et nous li devantdiz Jehans de Chalon Estienes et Perrins volons et acordons par le loux et par le consentement doudit conte que ladite division soit nulle et que li heritaiges doudit conte chestiaux viles et rentes soient devisez et partis entiers es bons us de Bourgoigne loialment et en bone foy c'est à savoir que à nous ladite contesse pour noz enfant doie avenir la tierce partie et à moy ledit Othenin pour moy et pour mes freres et pour mes serours l'autre tierce partie et à nous ledit Jehan de Chalon Estienes et Perrin l'autre tierce partie Et est à savoir que nous volons outroions et acordons que cildiz partaiges et cestedite division ensi come dessus sunt devis soient fait à regart et à dit à noble baron Thierriz conte de Mombeliart Estene signour d'Oyseler Symon de Jonvile signour de Jayz et Richart de Mombeliart signour de Monfort liquex doivent faire cesdiz partaiges bien et loialment à lour esciant per lour soirement Et volons encores et acordons que les chestiaus et les rentes desquex lidiz Jehans cuens de Bourgoigne et sires de Salins estoit tenant à jour de la confection de ces lettres soient mis après le decès doudit conte en la main des devantdiz Estene signour d'Oyseler Symon signour de Jayz qui les tiegnent et gardoient entretant que lidiz partaiges soient fait et les rentes et les yssues gardoient pour nous ausi tanque lidiz partaiges soient fait lesques yssues et lesquex fruit doivent estre partiz entierz ansi come dessus est devis de l'eritaige Et est à savoir que li chestiaus et les rentes quiconque les tiegne de nous devantdiz que sunt de part ledit conte venuz à nous doivent estre mis audit partaige et en ladite division senz ce que à nous ladite Lore contesse et à nous autres devantdiz doit estre saux tel droit et tel raison con nous poons avoir et devons par autre raison que per la division qui fut faite par ledit conte per sesdites lettres pendans et prometons En tesmoint de laquel chose je lidiz Othenins de Bourgoigne et nous ladite Lore contesse et je li devantdiz Jehans de Chalon et je lidiz Estienes avons mis noz seaux pendant en ces lettres Et je lidiz Perrins li Boviers pour ce que je n'ay seal ay prié et requis le religious home Willame abbé de La Charité qu'il mete son seel en ces lettres Ce fut fait l'endemain de la nativité Nostre Dame l'an de grace qui corroit per mil doux cens sexante et sait